Ռուսաստանի տնտեսության կայունությունը զերծ կպահի Հայաստանին 2012 թվականի էական ցնցումներից

ԵՐԵՎԱՆ, 4 նոյեմբերի. /Նովոստի-Արմենիա/. Ռուսաստանի տնտեսության կայունությունը 2012 թվականին զերծ կպահի Հայաստանին էական ցնցումներից, ասաց ՀՀ Կենտրոնական բանկի նախկին ղեկավար Բագրատ Ասատրյանը:

«Ռուսաստանի ՀՆԱ-ի աճի գնահատականները նվազել են մինչև 4 տոկոսանոց մակարդակի, և եթե այդ իրավիճակը կայուն պահպանվի, ապա կարելի է պնդել, որ Հայաստանում հնարավոր կլինի հաջորդ տարվա ընթացքում խուսափել ցնցումներից»,- ասաց նա ուրբաթ օրը մամուլի ասուլիսի ընթացքում:

Ասատրյանը պարզաբանեց, որ խոսքը, հիմնականում, վերաբերում է ֆինանսական հոսքերին, մասնավորապես, տրանսֆերտներին:
«Եթե այսօրվա միտումները պահպանվեն, և արտասովոր ոչինչ ռուսական տնտեսությունում տեղի չունենա, ապա կարելի է ակնկալել, որ Հայաստան ուղղվող մասնավոր տրանսֆերտների մակարդակը 2012 թվականին կհասնի նախաճգնաժամային մակարդակի»,- ասաց Ասատրյանը:
Կենտրոնական բանկի տվյալներով, ընթացիկ տարվա սեպտեմբերին Հայաստանի բանկային համակարգի միջոցով ֆիզիկական անձանց անունով ստացվել են շուրջ 180,7 մլն դրամական միջոցներ՝ նախորդ տարվա նույն ցուցանիշի համեմատ ավելանալով 13,9 տոկոսով (շուրջ 22,2 մլն դոլար):
Ֆիզիկական անձանց անունով ոչ առևտրային նպատակներով Ռուսաստանից Հայաստան դրամական փոխանցումները կազմել են 127,9 մլն դոլար՝ 2010 թվականի նույն ժամանակահատվածի շուրջ 108,6 մլն դոլարի դիմաց (աճը՝ 17,9 տոկոսով): -0-