Հարավկովկասյան երկաթուղու բեռնափոխադրումների ծավալը հունվար-օգոստոս ամիսներին աճել է 4,3%-ով և կազմել 2036,1 հազար տոննա

«Հարավկովկասյան երկաթուղի» ՓԲԸ-ի բեռնափոխադրումների ծավալը, համաձայն վիճակագրական տվյալների,  2011 թվականի հունվար-օգոստոս ամիսներին կազմել է 2036,1 հազար տոննա, ինչը 4,3%-ով գերազանցում է 2010թ.-ի նույն ժամանակահատվածի ցուցանիշը, «Նովոստի-Արմենիա» գործակալությանը հայտնեցին ընկերության մամուլի ծառայությունից:

2011 թվականի ութ ամիսների ընթացքում բեռնափոխադրումների փաստացի ցուցանիշը 7,6 տոկոսով գերազանցել է բեռնափոխադրումների՝  1893,1 հազար տոննայի չափով նախատեսված ծավալը:

Արտահանման հաղորդակցությունում ՀԿԵ-ի բեռնափոխադրումների ծավալը 2011 թվականի հունվար-օգոստոսին կազմել է 274,8 հազար տոննա, ինչը 27,1%ով գերազանցել է 2010 թվականի նույն ժամանակահատվածի ցուցանիշը:

Ներմուծման հաղորդակցությունում 2011թ.-ի ութ ամիսների ընթացքում տեղափոխվել է 836,7 հազար տոննա բեռ, ինչը 11,9 տոկոսով պակաս է նախորդ տարվա նույն ժամանակահատվածի ցուցանիշից:

Տեղական հաղորդակցությունում 2011թ.-ի հունվար-օգոստոսին փոխադրվել է 924,6 հազար տոննա բեռ, ինչը 17,6 տոկոսով գերազանցում է 2010 թվականի նույն ժամանակահատվածի ցուցանիշը:

Ինչպես ավելի վաղ նշել էր «Հարավկովկասյան երկաթուղի» ՓԲԸ-ի գլխավոր տնօրեն Շևքեթ Շայդուլինը, ընկերությունն անցած տարի կատարել է իր առջև դրված խնդիրները, և հիմնական ցուցանիշների աճը՝ այդ թվում նաև բեռնափոխադրումների ծավալների աճը շարունակվում է նաև 2011-ին: Նրա կարծիքով, նման արդյունքները ընկերության ճկուն սակագնային քաղաքականության վկայությունն են, որը բերում է բեռների արժեքում տրանսպորտային ծախսերի կրճատմանը:

«Եթե երկու տարի առաջ երկաթուղային բեռնափոխադրումների բաժինը բեռնափոխադրումների ընդհանուր ծավալում կազմում էր 22 տոկոս, ապա այժմ այն հասել է 35 տոկոսի: Մենք շարունակում ենք պայքարել երկաթուղի բեռների նոր ծավալների ներգրավման համար, զարգացնելով լոգիստիկան և դիվերսիֆիկացնելով մեր բիզնեսը: Նոր տեխնոլոգիաների ներդրումը թույլ է տալիս ապահովել մատուցվող ծառայությունների նոր որակը, ներգրավել բեռների նոր ծավալներ, բարձրացնել երկաթուղային փոխադրումների մրցունակությունը ավտոմոբիլայինի հետ համեմատ», - հայտարարել է Շայդուլլինը: 

«ՀԿԵ» ՓԲԸ-ն հանդիսանում է «Ռուսական երկաթուղիներ» ԲԲԸ-ի 100% դուստր ընկերությունը և իրականացնում է «Հայկական երկաթուղու» կոնցեսիոն կառավարումը: Համաձայն 2008թ.-ի փետրվարի 13-ին Երևանում կնքված պայմանագրի, կոնցեսիոն կառավարման ժամկետը կազմում է 30 տարի՝ կողմերի փոխադարձ համաձայնությամբ ևս 10 տարի երկարացման իրավունքով:--0-