Բրյանսկի օդանավակայանը վերսկսել է դեպի Երևան իրականացվող չվերթերը

Բազմամյա ընդմիջումից հետո Բրյանսկի միջազգային օդանավակայանը վերսկսել է դեպի Երևան ուղղությամբ չվերթերը՝ շաբաթ օրը Բրյանսկից Հայաստանի մայրաքաղաք է մեկնել առաջին չվերթը, հաղորդում է ՌԻԱ Նովոստին։

Երևան-Բրյանսկ-Երևան չվերթերը կանոնավոր կդառնան, ամեն շաբաթ՝ շաբաթ օրերին դրանք կիրականացնի Հայաստանի ազգային ավիափոխադրող «Արմավիա» ընկերությունը։

Ըստ չվացուցակի, Երևանից  թռիչքը նախատեսված է Երևանի ժամանակով 09.45-ին, վայրէջքը Բրյանսկում՝ Մոսկվայի ժամանակով 11.30-ին։ Բրյանսկից Երևան կարելի է մեկնել նույն օրը Մոսկվայի ժամանակով 13.10-ին, վայրէջքը՝ Երևանի ժամանակով 16.50-ին։ Ուղևորությունը կտևի 2 ժամ 45 րոպե։ Տոմսի արժեքը 6,5 հազար ռուբլի է մեկ ուղղությամբ, տոմսերի պատվերներն իրականացվում են Բրյանսկի և Բրյանսկի շրջանի՝ ավիատոմսեր վաճառող բոլոր տուրիստական գործակալություններում։

Ըստ «Բրյանսկ» օդանավակայանի գլխավոր տնօրեն Վլադիմիր Չիրիկովի, Երևանից դեպի Բրյանսկ և հակառակ ուղղությամբ թռիչքներն իրականացվում են  Bombardier CRJ-200 ինքնաթիռներով։ Նման ինքնաթիռները սարքավորված են «2+2» դասավորությամբ բազկաթոռների երկու շարքով և նախատեսված են 50 ուղևորի համար։

Հայկական սփյուռքը, որը Բրյանսկի շրջանում ավելի քան 16 հազարի է հասնում, մի քանի տարի շարունակ բանակցություններ է տարել շրջանային վարչակազմի հետ՝ դեպի Երևան իրականացվող չվերթերը վերսկսելու շուրջ: Սփյուռքի ներկայացուցիչներն այդ հարցով դիմել են Բրյանսկի նահանգապետին՝ ամեն շաբաթ իրականացվող ուղևորատար չվերթերի լիարժեք ծանրաբեռնվածություն խոստանալով։

Վերջին անգամ Բրյանսկի օդանավակայանից դեպի Հայաստան ավիաչվերթերն իրականացվել են 2003թ.-ին, սակայն չեղյալ են համարվել անշահավետության պատճառով։

Այս տարվա ապրիլին «Արմավիայի» սեփականատեր Միխայիլ Բաղդասարովը և Բրյանսկի շրջանի նահանգապետ Նիկոլայ Դենինը համաձայնագիր են ստորագրել Բաղդասարովի ղեկավարած MIKA Limited ընկերության կողմից «Բրյանսկ» միջազգային օդանավակայանում ներդրումներ կատարելու վերաբերյալ մտադրությունների մասին։ Ներդրողի ծրագրերում է «Բրյանսկ» օդանավակայանի թողունակությունը տարեկան մինչև մեկ միլիոն ուղևորի հասցնելը։ -0-