Վարորդական իրավունք ստանալու պարզեցված պայմաններն արդեն գործում են

Վարորդներն արդեն կարող են օգտվել վարորդական իրավունք ստանալու համար նախատեսված պարզեցված պայմաններից, երեքշաբթի լրագրողներին հայտնեց ՀՀ ճանապարհային ոստիկանության հաշվառման քննական և տրանսպորտային միջոցների տեխնիկական փորձաքննության բաժնի պետ, ոստիկանության փոխգնդապետ Արթուր Տոնոյանը:

Նրա խոսքով՝ կառավարության համապատասխան որոշումն ուժի մեջ է մտել նախորդ շաբաթ օրվանից:
«Վկայական ստանալու համար այլևս պետք չէ նարկոլոգիական և հոգեբուժական դիսպանսերի տեղեկանքը, պետք է չէ գնալ պոլիկլինիկա: Տեսական և գործնական հմտություններին տիրապետող վարորդները նախնական ուսուցում անցնելու կարիք չունեն հատուկ ուսումնական կազմակերպություններում»,- երկուշաբթի «Նովոստի» միջազգային մամուլի կենտրոնում ասաց Տոնոյանը:

Նա նաև նշեց, որ դրա փոխարեն ամեն ամսվա 1-ին և 16-ին Առողջապահության նախարարությունը ճանապարհային ոստիկանություն է ներկայկացնում հաշվառման կանգնած այն անձանց ցուցակը, որոնց հանդեպ համապատասխան ստուգումներ են անցկացվում:

Տոնոյանի խոսքով՝ Հայաստանի կամ այլ երկրի՝ ցանկացած 18 տարին բոլորած քաղաքացի կարող է դիմել տարածքային հաշվառման քննական ենթաբաժանմունք՝ վարորդական իրավունք ստանալու, փոխանակելու կամ վերականգնելու համար:

Նա նաև հայտնեց, որ ապագա վարորդները պետք է տեսական և գործնական քննություններ հանձնեն: Ընդ որում` քննությունները կարող են տալ թե մեխանիկական, թե ավտոմատ փոխանցման տուփով ավտոմեքենաներով: «Տեսական» քննությունը հանձնում են համակարգչով: Դրական է համարվում առաջադրած 10 հարցերին տված 9 ճիշտ պատասխանը:

Տոնոյանը հայտնեց, որ գործնական քննությունը նույնպես պարզեցվել է և այժմ այն հանձնում են ճանապարհային պայմաններում՝ բացառելով երկու փուլերից մեկը՝ քննությունը ավտոդրոմում: Գործնական քննության արդյունքը հաջող է համարվում, եթե վարորդը կատարում է առաջադրված ութ հանձնարարություններից 7-ը:
Տեսական քննություն հանձնելու համար պետք է ներկայացնել դիմում, անձը հաստատող փաստաթուղթ և վճարել պետական տուրքը՝ 3 հազար դրամի չափով: Տեսական և գործնական քննությունների համար, որոնց տևողությունն ընդամենը 15 րոպե է, ապագա վարորդներն, ընդհանուր առմամբ կվճարեն 28 հազար դրամ:

Նա նշեց, որ մարդկային գործոնը գրեթե բացառված է տեսական քննության ընթացքում, սիկ կոռուպցիոն ռիսկերը «գործնական» քննության ժամանակ հասցվել են նվազագույնի: «Ցանկացած խնդրով կարելի է զանգահարել 1-77 թեժ համարով»,- ասաց Տոնոյանը:

Նա նաև տեղեկացրեց, որ վարորդական իրավունքի նախկին՝ խորհրդային ժամանակների վկայականը փոխանակելու վերջնաժամկետը 2011 թվականի դեկտեմբերի 31-ն է:--0-