Համաշխարհային բանկի հետ համագործակցությունը կարեւոր քայլ է. ՏՄՊՊՀ նախագահ

ՀՀ տնտեսական մրցակցության պաշտպանության պետական հանձնաժողովի նախագահ Աշոտ Շահնազարյանն այսօր ընդունել է ՀԲ Հայաստանի գրասենյակի տնօրեն Արիստոմենե Վարուդակիսին, ֆինանսական եւ մասնավոր հատվածի զարգացման Եվրոպական եւ Կենտրոնական Ասիայի տարածաշրջանային տնօրեն Ֆերնանդո Մոնտես-Նեգրետին եւ ՀԲ Հայաստանի գրասենյակի տնտեսագետ Կարեն Գրիգորյանին:

«Սա հանձնաժողովի եւ Համաշխարհային բանկի միջեւ համագործակցության առաջին քայլն է: Համաշխարհային բանկի հետ համագործակցությունը կարեւոր քայլ է եւ արդյունավետ կարող է լինել ինստիտուցիոնալ զարգացման խնդրում»,- հանձնաժողովի մամուլի քարտուղար Ա. Ուդումյանի փոխանցմամբ՝ ասել է հանձնաժողովի նախագահը:

Ա. Շահնազարյանը նշել է  այն ուղղությունները, որոնցով ակնկալում է ՀԲ աջակցությունը. օրենսդրական դաշտի բարելավում (անկախության կարգավիճակի ապահովման մեխանիզմներ, որոշումների կատարման պարտադիրություն եւ այլն), կարողությունների ձեւավորում, հանրային իրազեկում:

Ստացված տեղեկատվության համաձայն՝ Ֆ. Մոնտես-Նեգրետին հետաքրքրվել է  մինչ այժմ նշված ուղղություններով  ձեռնարկված քայլերով  և արձանագրված արդյունքներով։

«ՀԲ Հայաստանի գրասենյակի տնօրեն Ա. Վարուդակիսը հայտնեց, որ առաջիկայում նախատեսվող ծրագրերում կքննարկվեն հանձնաժողովի հետ հետագա համագործակցության ձեւաչափը եւ ծրագրի իրականացման հետագա քայլերը»,-ասված է հաղորդագրությունում:--0--