ԵՐԵՎԱՆ, 1 մարտի./Նովոստի–Արմենիա/. Բենզինն ու դիզվառելիքը մատակարարվում են Հայաստան բացառապես Ռուսաստանից, Իրանից, Ռումինիայից և Բուլղարիայից, հայտարարեց Հանրային ծառայությունները կարգավորող հանձնաժողովի նախագահ Գեղամ Գևորգյանը երեքշաբթի ԱԺ նիստի ժամանակ։
Загружается новость ... "Лево"
Այս մասին նա նշեց, ի պատասխան «Հայաստան» ընդդիմադիր խմբակցության քարտուղար Արծվիկ Մինասյանի այն հարցին, թե արդյո՞ք բենզինի և դիզվառելիքի հայկական շուկայում կա ադրբեջանական ծագման բենզին, արդյո՞ք շուկայում գործող կազմակերպություններն ուղղակիորեն կամ անուղղակիորեն կապված են ադրբեջանական կազմակերպությունների հետ, արդյոք բենզինի և դիզվառելիքի շուկայում ադրբեջանական «SOCAR» ընկերության դերակատարումը կա՞, թե՞ ոչ:
«Բենզինն ու դիզվառելիքը Հայաստան են գալիս գերակշիռ մասը Ռուսաստանից («Ռոսնեֆտ», «Լուկոյլ», «Գազպրոմ»), Իրանից, մի փոքր մասը` Ռումինիայից և Բուլղարիայից։ Ես վստահաբար ասում եմ, որ Հայաստանում այլ երկրի ծագման որևէ բենզին չկա», – նշեց նա։
Գևորգյանն ընդգծեց, որ սահմանի վրա հսկողություն տեղի է ունենում ԵԱՏՄ ռեժիմով, սակայն դա չի խանգարում, որ Հայաստանը ևս բովանդակային վերահսկողություն իրականացնի տեղում։
Հայաստանում բենզինի և դիզվառելիքի գները 2022թ.–ի հունվարին, 2021թ.–ի դեկտեմբերի համեմատ, նվազել են 2,1%–ով և 0,6%–ով։ 2022թ.–ի հունվարին, 2021թ.–ի հունվարի համեմատ, բենզինն ու դիզվառելիքը թանկացել են համապատասխանաբար 36%–ով և 44,1%–ով։–0–