ԵՐԵՎԱՆ, 28 հոկտեմբերի. /Նովոստի–Արմենիա/. Հայաստանը Համաշխարհային բանկի և Միջազգային ֆինանսական կորպորացիայի (IFC) Doing Business-2016 վարկանիշում 189 երկրների շրջանում զբաղեցրել է 35–րդ հորիզոնականն` առաջ անցնելով ԵՏՄ բոլոր երկրներից։
Ինչպես նշվում է ՀԲ–ի պաշտոնական կայքում հրապարակված զեկույցում, Հայաստանը գտնվում է Ճապոնիայի (34–րդ հորիզոնական) և Չեխիայի (36–րդ հորիզոնական) միջև` երեք հորիզոնականով բարելավելով իր տարեկան ցուցանիշը:
Այսպես, ԵՏՄ երկրներից Ռուսաստանը զբաղեցրել է 51–րդ հորիզոնականը, Ղազախստանը` 41–րդ, Բելառուսը` 44–րդ, իսկ Ղրղըզստանը` 67–րդ։ Միաժամանակ, հետխորհրդային տարածքի երկրներից Հայաստանից առաջ է միայն Վրաստանը, որը զբաղեցնում է 24–րդ հորիզոնականը։ Մոլդովան զբաղեցրել է 52–րդ հորիզոնականը, Ադրբեջանը` 63–րդ, Ուկրաինան` 83–րդ, Ուզբեկստանը` 87–րդ, Տաջիկստանը` 132–րդ։
Սեփական բիզնեսը գործարկելու և զարգացնելու համար լավագույն պայմաններն առաջարկում է Սինգապուրը։ Առաջատարների հնգյակում են Նոր Զելանդիան, Դանիան, Հարավային Կորեան, Հոնկոնգը, իսկ վարկանիշի վերջին հորիզոնականում Էրիթրեան է։
Doing Business ամենամյա հետազոտությունը գնահատում է ձեռնարկատիրական գործունեություն իրականացնելու հարմարավետությունը` հիմնվելով տասը ցուցանիշների վրա, որոնք են ձեռնարկությունների գրանցման, շինարարության թույլտվություն ստանալու պարզությունը, էլցանցերին միանալը, վարկեր ստանալը, մինորիտար ներդրողների իրավունքների պաշտպանությունը, հարկեր վճարելը, միջազգային առևտուրը, պայմանագրերի կատարման ապահովումը, սնանկության մասին որոշումը։ –0–
