ԵՐԵՎԱՆ, 4 հոկտեմբերի. /Նովոստի–Արմենիա/. ՀՀ վարչապետ Նիկոլ Փաշինյանը կիրակի մասնակցել է «Կամար» բիզնես կենտրոնի հանդիսավոր շնորհանդեսին։ «Նովոստի–Արմենիա» գործակալությունը մասնակցել է միջոցառումներին և որոշել է տպավորություններով կիսվել ընթերցողների հետ։
Ինչու՞ «Կամար»
«Կամար» բիզնես կենտրոնն աշխատում է այս տարվա ապրիլից, կառուցվածքում ներդրվել է մոտ 40 մլն դոլար, այս պահին այն արդեն ամբողջովին համալրված է. շենքում տեղակայվել են հայտնի ընկերությունների գրասենյակներ, դիվանագիտական ներկայացուցչություններ և Ամերիաբանկի գլխավոր գրասենյակը։
Ինչպես նշեց բիզնես կենտրոնի շինարարության ծրագրի ղեկավար Արտաշես Կազախեցյանը, բիզնես կենտրոնի գլխավոր առանձնահատկությունն այն է, որ կենտրոնը միավորում է երկու պատմական շինություններ, որոնք գտնվել են այդ վայրում մոտ 100 տարի առաջ` Գյուղատնտեսական բանկի շենքն ու Թիֆլիսի առևտրային բանկի հին շենքը։ Հատկանշական է, որ ճարտարապետները շենքը մշակելիս որոշել են այս երկու պատմական շինությունները կապել կամարով, որի կենտրոնում «կենաց ծառն» է։ Միաժամանակ, հին շենքերի տարրերը կարելի է տեսնել նաև շինության ինտերիերի ձևավորման մեջ, որտեղ արդեն տեղափոխվել է հին շենքի մի մասը, որն իր հերթին ներդաշնակորեն միահյուսվում է ժամանակակից դիզայնի տարրերի հետ։ Բացի այդ, Ամերիաբանկի մուտքի դռան դիզայնում անգամ պահպանված է Թիֆլիսի առևտրային բանկի հին զինանշանը։
«Շենքն առանձնանում է նաև նրանով, որ այն առաջինն ու բացառիկն է իր էկոհամակարգով, իսկ կենդանի բույսերից պատրաստված «կանաչ գոտին» սահմանել է ռեկորդ, այն ամենաբարձր «կենդանի» պատն է Եվրոպայում», – նշեց նա։
Առանձին ուշադրության է արժանի Ամերիաբանկի նոր բեք–գրասենյակի հայեցակարգը, որտեղ փորձ է արվել կոտրել բանկային կարծրատիպերն ու աշխատակիցների համար ստեղծել ազատ աշխատելու, ստեղծարար գաղափարներ գեներացնելու մթնոլորտ և պայմաններ։
Ամերիաբանկի չորս հարկերի ինտերիերը մշակված է «Ամերիա քաղաք» թեմայով. յուրաքանչյուր հարկի մթնոլորտը մարմնավորում է քաղաքի զարգացումը` տեղափոխելով դեպի անցյալ և ապագա, ժամանակային և ուրբանիստական տարբեր ոճեր։ 9,7 հազար քմ տարածքում համադրված են հին Երևանի ճարտարապետության, արդյունաբերական downtown–ի, էկոլոգիական քաղաքի և ժամանակակից, նորարարական տեխնոլոգիական կերպարի տարրերը։ Հարկերից յուրաքանչյուրը ձևավորված է ներկայացված չորս կոնցեպտների շրջանակում։
Սելֆի վարչապետի հետ
Չնայած որ շենքը փաստացի բացվել է ապրիլին, պետության առաջին դեմքի համար հանդիսավոր շնորհանդեսը տեղի է ունեցել այս կիրակի։ Շնորհանդեսին վարչապետի հետ միասին մասնակցել են ՀՀ ԿԲ նախագահ Արթուր Ջավադյանը, «Ամերիա» խմբի խորհրդի անդամ Ռուբեն Վարդանյանը, «Ամերիաբանկի» աշխատակիցներ և բիզնես կենտրոնում տեղակայված այլ ընկերությունների ներկայացուցիչներ։
Մինչ հյուրերը շրջում էին շենքով Փաշինյանն անակնկալ մատուցեց նրանց. նա բիզնես կենտրոն եկավ հեծանիվով` այդ ամենը ներկայացնելով Facebook–յան ուղիղ եթերում։
Վարչապետը մեծ հետաքրքրությամբ ծանոթացավ շենքում գործող թանգարանին, որտեղ ներկայացված են բացառիկ պատմական լուսանկարներ, բանկի ստեղծման մասին վկայող փաստաթղթեր ու բանկի կնիքը, ինչպես նաև դիտեց հին և նոր շինությունների պատմության մասին պատմող ֆիլմը։
Վարչապետը հատուկ ուշադրություն դարձրեց շենքի դիզայնի տարրերին. նա չկարողացավ անտարբեր անցնել վիրտուալ ինքնաթիռով պատի կողքով, որի ֆոնին սելֆի արեց Ամերիաբանկի տնօրինության նախագահ–գլխավոր տնօրեն Արտակ Հանեսյանի հետ։
Ինչպես պարզաբանեցին Փաշինյանին, ինքնաթիռի սրահով պատը բացառիկ է, լուսանկարի մեջ այն վերածվում է 3D մոդելի` ապահովելով իրական ինքնաթիռի սրահում գտնվելու էֆեկտ։
Վարչապետին ուրախացրեց նաև հեռախոսային խցիկը, որտեղ տեղադրված է բազկաթոռ և հեռախոս, որը վարչապետը շտապեց փորձել, ինչպես նաև նստեց ռետրո ավտոմեքենայի ոճով պատրաստված սեղանի մոտ։
Փաշինյանին, կարծես, շատ էր դուր եկել շենքով կատարված շրջայցը, և նա հեռանալուց առաջ մի քանի սելֆի արեց Ամերիաբանկի աշխատակիցների հետ։ Ընդ որում, վարչապետը հրաժարվեց սելֆիի ապարատներից` օգտվելով իր անձնական հեռախոսից։ Նա իր հայտնի ուսապարկից հանեց սելֆիի համար նախատեսված ձողն ու մի քանի լուսանկար արեց։
Վարչապետը հեռացավ շենքից հեծանիվով և բարձր տրամադրությամբ։–0–
