Հայաստանում բազմազավակ ընտանիքներին 4 մլն դրամի օգնություն կտրամադրվի

ԵՐԵՎԱՆ, 19 դեկտեմբերի./Նովոստի-Արմենիա/. Հայաստանում բազմազավակ ընտանիքները ֆինանսական օգնություն կստանան, հինգշաբթի տեղի ունեցած կառավարության նիստի ժամանակ ասել է ՀՀ Աշխատանքի և սոցիալական հարցերի նախարարության տեղակալ Գեմաֆին Գասպարյանը:

Հինգշաբթի նիստի ժամանակ կառավարությունը հավանություն է տվել «Հայաստանի պետական պարգևների և պատվավոր կոչումների» մասին օրենքի մեջ լրացումներ մտցնելուն:

Կառավարության որոշմամբ սահմանվել է 6 և ավելի երեխա ունեցող և «Ծնողական փառքի» մեդալով պարգևատրված ծնողների համար ամսական ֆինանսական աջակցության տեսակ, որն ավելի կընդգծի նրանց ունեցած ավանդը ժողովրդագրական իրավիճակի բարելավման և առաջընթացի գործում: Ծնողական փառքի մեդալով պարգևատրված ծնողների (ընտանիքների) թիվը ինն է: Նախագծի ընդունումը կհանգեցնի ՀՀ պետական բյուջեից լրացուցիչ միջոցների հատկացման անհրաժեշտության: Օրենքի նախագծի ընդունումից հետո տվյալ տարվա ՀՀ պետական բյուջեից լրացուցիչ կտրամադրվի 4 մլն 320 հազ. դրամ:-0-