Հայաստանում Ամանորից առաջ թանկացած մթերքների տասնյակը

ԵՐԵՎԱՆ, 13 դեկտեմբերի. /Նովոստի–Արմենիա/. Հայաստանում արդեն մի քանի շաբաթ բուռն կերպով քննարկվում է լայն սպառման ապրանքների թանկացումը։

Այս հարցը շատ է մտահոգում հասարակությանը մի շարք օբյեկտիվ պատճառներով։ Առաջին հերթին դա աղքատության մակարդակն է, որը հանրապետությունում կազմում է 29,4% և ցածր աշխատավարձերը։ Դժգոհությունը սաստկացնում է նաև մոտեցող Ամանորին նախապատրաստվելու հարցը։ Ավանդաբար տոների նախաշեմին ամեն ինչ թանկանում է, սակայն այս անգամ գները սկսեցին բարձրանալ մի փոքր ավելի շուտ օբյեկտիվ և սուբյեկտիվ պատճառներով։


ՀՀ ազգային վիճակագրական ծառայությունը հրապարակել է սպառողական գների ցուցիչները 2017 թ.–ի հունվար–նոյեմբերի համար։

«ԱՌԿԱ» գործակալությունը ներկայացնում է 10 մթերքներ, որոնք ամենից շատն են թանկացել 2017 թ.–ի նոյեմբերին` 2016 թ.–ի նոյեմբերի համեմատ։

ԱՎԾ–ի տվյալներով, «պատվավոր» առաջին հորիզոնականում սերուցքային կարագն է, որը 2017 թ.–ի նոյեմբերին, 2016 թ.–ի նոյեմբերի համեմատ, թանկացել է 40,7%–ով։ Միայն ամսվա ընթացքում կարագի գինն ավելացել է 5,5%–ով։

Երկրորդ տեղում խոզի միսն է, որի գինն ավելացել է 40,3%–ով։ Այնուհետև գալիս է կարտոֆիլը (29%), թարմ և սառեցված ձուկը (28,2%), ոչխարի ու գառան միսը (26,9%), տավարի և հորթի միսը (12,9%), պանիրն ու կաթնաշոռը (8,5%), ձիթապտղի ձեթը (6,5%), ինչպես նաև մանկական սնունդը (3,2%)։

«Միս» խմբի ապրանքների գներն աճել են միջինը 9,6%–ով, «ձուկ և ծովամթերք» խմբինը` 25,1%–ով, «յուղեր և ճարպեր» խմբինը` 14,5%, «կաթնամթերք, պանիր և ձու»  խմբինը` 4,3%–ով։

ԱՎԾ–ի տվյալներով, սպառողական գները նոյեմբերին աճել են 1,1%–ով, պարենային ապրանքներինը` 1,8%–ով։–0–