ԵՐԵՎԱՆ, 8 հունիսի. /Նովոստի–Արմենիա/. Վերջին օրերին Հայաստանում տեղացած կարկտից տուժել է Արմավիրի մարզի չորս համայնք, Կոտայքի մարզի յոթ համայնք, Լոռու մարզի երեք համայնք և Տավուշի մարզի չորս համայնք, հայտարարեց ՀՀ գյուղատնտեսության նախարար Սերգո Կարապետյանը։
Շաբաթ օրը տեղացած կարկտախառը անձրևը վնասել է ծիրանի, խնձորի, խաղողի այգիներն ու ցանքատարածքները։
«Այս համայնքներում բերքին հասցված վնասը տատանվում է 20 տոկոսից մինչև 60–70 տոկոսի սահմանում», – նշեց Կարապետյանը չորեքշաբթի խորհրդարանում կազմակերպված կառավարական ժամի ընթացքում։
Նախարարն ավելացրեց, որ կարկուտ է տեղացել Հայաստանի 45 համայնքներում։ Նա նշեց, որ վնասն այդքան մեծ չէ` ագրոհատվածում լուրջ իրավիճակի մասին խոսելու համար։
«Մայիս–հունիսին հազվադեպ չէ, որ կարկուտ է տեղում։ Նման երևույթ հաճախ է գրանցվում տարվա այս ժամանակահատվածում», – պարզաբանեց նա։
Կարապետյանի խոսքով` Արմավիրի մարզում տեղադրված 172 հակակարկտային կայանքներին վերջին օրերին ավելացել է ևս 18–ը, և առաջիկայում նախատեսվում է ավելացնել դրանց քանակը։
ՀՀ գյուղատնտեսության նախարարը նշեց, որ կարկտից տուժած համայնքներ վարչապետի այցի ընթացքում քննարկվել է այն ֆերմերական տնտեսությունների վարկավորման հարցը, որոնց վարկերի մարման ժամկետները մոտենումեն և որոնք կարող են բախվել դժվարությունների հետ վճարումներ իրականացնելիս։
«Կա վարչապետի հանձնարարականը, և առաջիկայում մարզպետարանները կներկայացնեն ցուցակներ` ԿԲ–ի աջակցությամբ վարկերի հարցը լուծելու համար», – ավելացրեց Կարապետյանը։ –0–