ԵՐԵՎԱՆ, 17 մայիսի. /Նովոստի–Արմենիա/. ԵՏՄ–ի և Իրանի միջև ազատ առևտրի գոտու մասին համաձայնագիրը նոր հնարավորություններ է բացում Հայաստանի առաջ, Facebook–յան իր էջում գրել է ՀՀ փոխվարչապետ Տիգրան Ավինյանը։
Նախօրեին Աստանայում ստորագրվել է համաձայնագիր, որը նախատեսում է ԵՏՄ անդամ պետությունների և Իրանի միջև ազատ առևտրի գոտու ստեղծում։ Բանակցությունների արդյունքում, որոնք ընթացել են 2016 թ.–ից, պայմանավորվածություն է ձեռք բերվել մի շարք հաստատված ապրանքների համար ԵՏՄ անդամ պետությունների և Իրանի միջև փոխադարձ առևտրի ներկրման մաքսային տուրքերի նվազեցման մասին երեք տարի ժամկետով։
«Երկարատև և բարդ բանակցություններից հետո այսօր կնքվեց ԵԱՏՄ - Իրան ազատ առևտրի համաձայնագիրը։ Հատուկ ուզում եմ նշել հայկական կողմի լրջագույն աշխատանքը, որը իրականացվել է բանակցությունների ամբողջ ընթացքում, ինչի մասին խոսում են մեր բոլոր գործընկերները»,– գրել է Ավինյանը։
Նա համոզմունք է հայտնել, որ համաձայնագիրը նոր հնարավորություններ է բացելու հայկական արտադրողների համար իրանական շուկա մտնելու համար, ինչպես նաև շատ բարենպաստ պայմաններ Հայաստանում նոր արտադրական հզորություններ հիմնելու համար։
ՀՀ կառավարության պատվիրակությունը, փոխվարչապետ Տիգրան Ավինյանի գլխավորությամբ, նախօրեին մեկնել է Աստանա ԵՏՄ անդամ–երկրների աշխատանքային հանդիպմանը մասնակցելու նպատակով։ Հանդիպման շրջանակում նախատեսվում է իրականացնել «Եվրասիական տնտեսական միության անդամ պետությունների և Իրանի Իսլամական Հանրապետության միջև ժամանակավոր ազատ առևտրի մասին» և «Եվրասիական տնտեսական միության անդամ պետությունների և Չինաստանի Ժողովրդական Հանրապետության միջև առևտրատնտեսական համագործակցության մասին» համաձայնագրերի տեքստերի վերջնական տեխնիկական շտկումներ։
ԵՏՄ–ի և Իրանի միջև կգործարկվի ազատ առևտրի գոտի, որը նախատեսում է ապրանքների բավականին լայն տեսականու համար ներկրման մաքսային տուրքի նվազեցում կամ զրոյացում։ Չինաստանի հետ ձեռք են բերվել պայմանավորվածություններ լայնաֆորմատ և ոլորտային համագործակցության շուրջ։–0–
