ԵՐԵՎԱՆ, 19 ապրիլի. /Նովոստի-Արմենիա/. «Վերածնունդ» 9-րդ միջազգային մրցույթ-փառատոնի բացման հանդիսավոր արարողությունը կայացավ չորեքշաբթի Գյումրիում, հայտնում է «Նովոստի-Արմենիա» գործակալության թղթակիցը:
«Հպարտ եմ, որ Գյումրիում այսպիսի փառատոն է անցկացվում»,- նշեց Գյումրու քաղաքապետ Սամվել Բալասանյանը:
Գյումրիում սկսվել է հանդիսավոր գալա համերգ:
Այս տարի փառատոնին մասնակցում է աշխարհի 40 երկրներից ժամանած, ինչպես նաև Հայաստանից և Արցախից ռեկորդային թվով երաժիշտներ: Իսկ ժյուրիի կազմում են աշխարհի 14 երկրների, այդ թվում՝ ԱՄՆ-ի, ՌԴ-ի, Ավստրիայի, Չինաստանի, Իտալիայի, Արաբական Էմիրությունների արվեստի գործիչներ: Այս տարի հաղթողներն ընտրվելու են 19 անվանակարգերում:
Փառատոնի կարգախոսն է այս տարի՝ «Ոչ ահաբեկչությանը և պատերազմներին»:
Հայաստանի առաջին տիկին Ռիտա Սարգսյանի բարձր հովանու ներքո անցկացվող միջոցառման կազմակերպիչներն են՝ Հայաստանի մշակույթի նախարարությունը, «Փյունիկ» մարդկային ռեսուրսների զարգացման համահայկական հիմնադրամը, Կոմիտասի անվան պետական կոնսերվատորիայի Գյումրու մասնաճյուղը, «Վերածնունդ» միջազգային մրցույթ-փառատոն ՀԿ-ն:
«Վերածնունդ» միջազգայի մրցույթ-փառատոնը Հայաստանում անցկացվում է 2009 թվականից: Միջոցառման հիմնական նպատակը դասական, էստրադային և ազգային արվեստի քարոզչությունն է, ստեղծագործական և ընկերական նոր կապերի ստեղծումը տարբեր ազգերի կատարող-երաժիշտների միջև, ինչպես նաև արվեստի օտարերկրացի գործիչներին Հայաստանի պատմամշակութային ժառանգության հետ ծանոթացնելը: Փառատոնը հնարավորություն է ընձեռում երիտասարդությանն ինքնարտահայտվել, ճանաչել սեփական հնարավորությունները:
«Նովոստի-Արմենիա» գործակալությունը փառատոնի տեղեկատվական հովանավորն է: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
