Սերժ Թանկյանը, Ատոմ Էգոյանը և Արսինե Խանջյանը կոչ են արել աշխարհի արվեստագետներին օգնել Արցախին (ՏԵՍԱՆՅՈՒԹ)

ԵՐԵՎԱՆ, 4 ապրիլի. /Նովոստի-Արմենիա/. Աշխարհահռչակ ամերիկահայ ռոք երաժիշտ Սերժ Թանկյանը, կանադահայ կինոռեժիսոր Ատոմ Էգոյանը, նրա կինը` դերասանուհի Արսինե Խանջյանը և ռեժիսոր Էրիկ Նազարյանը կոչ են արել աշխարհի արվեստագետներին այցելել Արցախ։

Նախօրեին Ստեփանակերտում կայացած համատեղ մամուլի ասուլիսում Խանջյանն ընթերցել է աշխարհի արվեստագետներին ուղղված համատեղ հայտարարությունը` կոչ անելով նրանց ժամանել Արցած, գործակցություն հաստատել տեղի տաղանդների հետ, բացահայտել նրանց աշխարհի համար և օգնել իրագործել խաղաղ ժամանակ արարելու իրավունքը։



Ինչպես ասվում է ուղերձում, Ադրբեջանի սանձազերծած պատերազմի պատճառով արցախյան երիտասարդությունը զրկված է խաղաղ արարելու և սեփական տաղանդները բացելու հնարավորությւոնից, իսկ սահմանամերձ շրջանների հազարավոր աշակերտներ երգի և երաժշտության դասերի փոխարեն լսում են պայթյունների և կրակոցների ձայներ։



«Սակայն, դրա հետ մեկտեղ, երկրում մեծ թվով տաղանդավոր երիտասարդներ են ապրում, ովքեր շարունակում են գրել, նկարել և նվագել` լինելով մեկուսացված։ Ցավալի է, որ նրանք այլ երկրների իրենց հասակակիցների հետ կապեր հաստատելու քիչ առիթներ ունեն»,– նշում են հայտարարության հեղինակները։

Նրանք հիշեցրել են, որ ուղիղ մեկ տարի առաջ այս օրերին Արցախի շփման գծում իրավիճակը կրկին սրվել էր, երբ Ադրբեջանի զինված ուժերն անսպասելի գրոհել են ոչ միայն առաջնագծի դիրքերը, այլ նաև խաղաղ բնակավայրերը, դպրոցները, անզեն գյուղացիներին։ Սակայն հայկական զորքերն արդեն երկրորդ անգամ պատասխանել են ադրբեջանական ագրեսիային, որի միակ հետևանքը երկու կողմերից կրած մարդկային և նյութական կորուստներն էին»,– ասվում է հաղորդման մեջ։ -0-