Սերժ Թանկյան. իմ արցախյան համերգը շատ չի ուշանա

ԵՐԵՎԱՆ, 5 ապրիլի. /Նովոստի-Արմենիա/. Աշխարհահռչակ ամերիկահայ ռոք երաժիշտ, System of a Down խմբի մենակատար Սերժ Թանկյանը խոստացել է մենահամերգով հանդես գալ Արցախում:

«Ես շատ կցանկանայի ևս մեկ անգամ լինել և ելույթ ունենալ Արցախում: Եթե ինձ հաջողվի, ինձ հետ արվեստի այլ գործիչների կբերեմ», - ասել է նա Artsakhpress–ին տված հարցազրույցում:

Թանկյանի խոսքով, այսօրվա դրությամբ շատ կարևոր է խոսել Արցախի մասին և ներկայացնել այն տարբեր երկրներում:


«Բոլորը պետք է իմանան, որ Արցախը գեղեցիկ երկիր է և նրա բնակիչները բոլորին սպասում են մեծ սիրով և ժպիտով: Հուսով եմ, որ իմ համերգն Արցախում շատ չի ուշանա», - ավելացրել է նա:

Թանկյանը կանադահայ ռեժիսոր Ատոմ Էգոյանի, նրա կնոջ` դերասանուհի Արսինե Խանջյանի, ռեժիսոր Էրիկ Նազարյանի հետ օրերս այցելել է Արցախ:

Ապրիլի 3-ին Ստեփանակերտում կայացած համատեղ մամուլի ասուլիսի ընթացքում Խանջյանն ընթերցել է համատեղ հայտարարություն, որը հասցեագրված է աշխարհի ազատամիտ արվեստագետներին` կոչ անելով նրանց այցելել Արցախ, համագործակցել տեղի տաղանդների հետ, ներկայացնել նրանց աշխարհին և օգնել իրականացնել նրանց խաղաղ ժամանակներում ստեղծագործելու համամարդկային իրավունքը: -0-