«ՌեԱնիմանիա» յոթերորդ փառատոնն է մեկնարկել Երևանում

ԵՐԵՎԱՆ, 28 հոկտեմբերի. /Նովոստի–Արմենիա/. Երևանի միջազգային անիմացիոն կինոյի և պատկերապատման արվեստի «ՌեԱնիմանիա» 7-րդ փառատոնը բացվեց «Մոսկվա» կինոթատրոնի Կարմիր դահլիճում։

Փառատոնը բացվեց «Վերածնունդ» պատկերապատման արվեստի (Comics Art) գրքերի ցուցահանդեսով, որտեղ ներկայացված են 11 գրքեր՝ նվիրված Հայոց ցեղասպանությանը։ Ցուցադրված են գրքերի շապիկի և մի քանի էջերի պատկերապատումները։

 Այնուհետև Կարմիր դահլիճում «ՌեԱնիմանիա» փառատոնի հիմնադիր տնօրեն Վրեժ Քասունու ողջույնի խոսքից հետո կայացավ ռեժիսոր Ալեքսանդր Հեբոյանն «Լուսնի պահապան» ֆիլմի ցուցադրությունը։
Այս տարի փառատոնի նախընտրական ժյուրին և պատվավոր միջազգային խորհուրդն ընտրել են 184 անիմացիոն ֆիլմ, որոնք կմասնակցեն 5 մրցութային ծրագրի՝ «Լավագույն լիամետրաժ ֆիլմ», «Լավագույն կարճամետրաժ ֆիլմ», «Լավագույն երաժշտական հոլովակ», «Լավագույն հեռուստատեսային և ուսուցողական ֆիլմ» և «Լավագույն ավարտական ֆիլմ»։

 Բացի այդ, «ՌեԱնիմանիա» փառատոնի շրջանակում կցուցադրվեն ոչ մրցութային ֆիլմեր, կներկայացվեն վավերագրական և էքսպերիմենտալ ֆիլմերի ծրագրերը, Հայոց ցեղասպանության 100-րդ տարելիցին նվիրված «Վերածնունդ» անիմացիոն ֆիլմերի ծրագիրը, իսկ արդեն բացված պատկերապատման արվեստի ցուցահանդեսը բաց կլինի մինչև փառատոնի ավարտը՝ նոյեմբերի 3-ը։

Ընդհանուր առմամբ, «ՌեԱնիմանիա» փառատոնն այս տարի մեկ շաբաթվա ընթացքում կցուցադրի ավելի քան 400 ֆիլմեր։ Փառատոնի փակմանը կցուցադրվի «Մարգարեն» (ռեժիսոր՝ Ռոջեր Ալերս), որի արտադրությունն իրականացրել և գլխավոր հերոսուհուն հնչյունավորել է Սալմա Հայեքը (մուտքը հրավիրատոմսերով)։

«ՌեԱնիմանիա» միջազգային անիմացիոն կինոփառատոնն առաջին անգամ անցկացվել է Երևանում 2009 թվականին։ Նախագծի նխատակն անիմացիոն արվեստի օժանդակությունն է, համաշխարհային կարգի անիմատորների նոր սերնդի դաստիարակությունը և հայ անիմատորների աշխատանքների ցուցադրությունը համաշխարհային ասպարեզում, ինչպես նաև ամբողջ աշխարհից լավագույն անիմացիոն ֆիլմերի ցուցադրությունը։
«Նովոստի–Արմենիա» գործակալությունը փառատոնի տեղեկատվական հովանավորն է։
-0-