Մարկեսի սիրահարաներին. «Հարյուր տարվա մենությունը» կէկրանավորվի

ԵՐԵՎԱՆ, 6 մարտի./Նովոստի–Արմենիա/. Netflix սթրիմինգ–սերվիսը ձեռք է բերել Գաբրիել Գարսիա Մարկեսի «Հարյուր տարվա մենությունը» հայտնի վեպի էկրանավորման իրավունք։ Ընկերությունը սերիալ կնկարահանի իսպաներեն լեզվով, հայտնում է esquire.ru-ն` հղում անելով Variety–ն։

Դա կլինի 1967 թվականին հրապարակած հայտնի վեպի առաջին էկրանավորումը։ Նախագծի գործադիր պրոդյուսերներն են լինելու Մարկեսի որդիները` Ռոդրիգո Գարսիան (Rodrigo Garcia) և Գոնսալո Գարսիա Բարչան (Gonzalo García Barcha)։

«Տասնամյակներ շարունակ մեր հայրը չէր ուզում էկրանավորման իրավունք վաճառել, որովհետև կարծում էր, որ սահմանափակ ժամանակի պայմաններում և ոչ իսպաներեն լեզվով գեղարվեստական ֆիլմն իր գաղափարը չի փոխանցի»,– պատմում է Ռոդրիգո Գարսիան։


Սակայն նա ավելացրել է, որ սերիալների ծաղկման ժամանակաշրջանում չկա ավելի հարմար պահ գլոբալ լսարանին գիրքն ադապտացնելու համար։

Նկարահանումները կանցկացվեն Կոլումբիայում։ Այլ մանրամասներ Netflix–ն առայժմ չի հայտնում։

«Հարյուր տարվա մենությունը» մոգական ռեալիզմի ժանրով գրված ամենահայտնի վեպն է։ Վեպի գործողությունը ծավալվում է Մակոնդո հորինված քաղաքում, որտեղ ապրում է Բուենդիա ընտանիքի մի քանի սերունդ։ Գիրքը թարգմանվել է ավելի քան 50 լեզուներով։
1982 թվականին Մարկեսն արժանացել է գրականության Նոբելյան մրցանակի։ -0-