ԵՐԵՎԱՆ, 3 դեկտեմբերի. /Նովոստի–Արմենիա/. «Խաչատրյան և ջազ» բացառիկ նախագիծը կներկայացվի Խաչատրյանի անվան 3–րդ միջազգային փառատոնի եզրափակիչ համերգի ընթացքում դեկտեմբերի 5–ին։
Նախագծի շրջանակում Հայաստանի պետական երիտասարդական նվագախումբը Պետական ջազ նվագախմբի հետ համատեղ կներկայացնեն Արամ Խաչատրյանի մի շարք ստեղծագործություններ։
Ինչպես նշեց Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը, «Խաչատրյան և ջազ» նախագիծն աննախադեպ է և անսպասելի, որոշակիորեն նաև` էսքտրեմալ։
«Ասում են, որ դասական երաժշտությունը հիմքն է, որի հետ կարելի է համադրել ամեն ինչ։ Ցավոք, բազմաթիվ դասական երաժիշտներ դասական երաժշտությունը փորձում են մի փոքր անջատ ներկայացնել, միայն ակադեմիական ձևաչափով, բայց, անելով դա 21–րդ դարում, անհրաժեշտ է հասկանալ, թե կան արդյո՞ք դրական կողմեր, հենց այդ պատճառով մենք փորձել ենք համատեղել հիմնարար դասական երաժշտությունը ջազի հետ»,– ավելացրեց Սմբատյանը։ Հայաստանի պետական ջազ նվագախմբի ղեկավար Արմեն Հյուսնունցն իր հերթին նշեց, որ նախագծի գաղափարն ինչ–որ չափով արկածախնդրություն է պարունակում։
«Խաչատրյանի երաժշտությունը ջազային տարբերակով ներկայացնելը մեծ մարտահրավեր է։ Դա առաջին դեպքը չէ, երբ ջազ երաժիշտները կատարում են դասական կոմպոզիտորների աշխատանքներ, այդ իսկ պատճառով մեր այդ մոտեցումն արդարացված և հասկանալի եմ համարում»,– ընդգծեց Հյուսնունցը։
Նա ավելացրեց, որ ջազմենի համար խաչատրյանական ժառանգության հետ գործ ունենալը մեծ գայթակղություն է։
Արամ Խաչատրյանի անվան միջազգային փառատոնն անցկացվում է Հայաստանի նախագահ Սերժ Սարգսյանի հովանու ներքո։ Այդ երաժշտական տոնը կյանքի են կոչել Հայաստանի պետական երիտասարդական նվագախումբը Մշակույթի նախարարության օժանդակությամբ։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
