Աշխարհահռչակ Jamiroquai–ը ելույթ կունենա Հայաստանում (ՎԻԴԵՈ)

ԵՐԵՎԱՆ, 22 օգոստոսի. /Նովոստի-Արմենիա/. Jamiroquai բրիտանական հայտնի ջազ–ֆանկ խմբի ներկայացուցիչներն առաջին անգամ ելույթ կունենան Երևանում։

Համերգը կկայանա նոյեմբերի 6–ին «Հրազդան» մարզադաշտում։ «Իմ քայլը» հիմնադրամի մամուլի խոսնակ Հասմիկ Հարությունյանն իր Facebook–ում գրել է, որ այդ համերգը ««Իմ քայլը» հիմնադրամի աշնանային անակնկալն է»։

Խմբի անդամները ներկայացրել են համերգի վերաբերյալ տեղեկությունն իրենց Facebook–ում, բայց գրել են, որ համերգը կանցկացվի Ռուսաստանում։ Այդ թյուրիմացությունը խուճապի է մատնել օգտատերերին և խմբի երկրպագուներին, ովքեր այդպես էլ չեն հասկացել, թե որտեղ կանցնի համերգը։

Սակայն ավելի ուշ Jamiroquai–ի ներկայացուցիչները ներողություն են խնդրել և ասել են, որ դա «մարդկային սխալ էր» և հաստատել են համերգի անցկացումը Երևանի «Հրազդան» մարզադաշտում։

Jamiroquai խումբը վոկալիստ Ջեյ Քեյի գլխավորությամբ թողարկել է 9 ալբոմ, ստացել է բազմաթիվ երաժշտական մրցանակներ, այդ թվում «Գրեմմի» և MTV 4 մրցանակ։ Նրանց Travelling Without Moving ալբոմը գրանցվել է Գինեսի ռեկորդների գրքում որպես ֆանկ ոճի ամենավաճառվող ալբոմ։ -0-