Հայաստանի 103 արժեքավոր գտածո կցուցադրվի Իրանում

ԵՐԵՎԱՆ, 12 հոկտեմբերի. /Նովոստի Արմենիա/. Թեհրանի ազգային թանգարանում կբացվի Հայաստանի արժեքավոր գտածոների ցուցահանդես, որը կտևի մինչև հաջորդ տարվա հունվար։


Ինչպես հայտնում է iransegodnya.ru–ն, հոկտեմբերի 17–ից հունվարի 17–ն Իրանի ազգային թանգարանում կցուցադրվեն մ.թ.ա 4–րդ հազարամյակից մինչև առաջին դար ընկած ժամանակահատվածին վերաբերող 103 գտածոներ։ Ցուցանմուշների մի մասը կապված է Ուրարտու պետության հետ, որը գոյություն է ունեցել Հայկական լեռնաշխարհում մ.թ.ա 8-6–րդ դարերում։

Մշակութային նմուշներն Իրան են ժամանել հոկտեմբերի 3–ին Հայաստանի պատմության թանգարանի երկու ներկայացուցիչների ուղեկցությամբ և տեղափոխվել Իրանի ազգային թանգարան։

Ցուցադրությունը կկոչվի «Իրան և Հայաստան. թագավորության հիշողությունը»։


Ցուցահանդեսում հատուկ ուշադրություն կհատկացվի այն գտածոներին, որոնք վերաբերում են Ուրարտուի հնագույն պետության գոյության ժամանակներին։ Ինչպես հայտնի է, Իրանի և Հայաստանի ընդհանուր պատմության սկիզբը վերաբերում է հենց ուրարտական ժամանակաշրջանին։ Ցուցանմուշների թվում կլինեն նաև Սեմնան և Գիլյան գավառներում պեղումների ժամանակ գտնված գտածոները։

Միջոցառումը կազմակերպվել է Իրանի մշակութային ժառանգության, արհեստների և զբոսաշրջության կազմակերպության և Հայաստանի մշակույթի նախարարության միջև ստորագրած հուշագրի շրջանակում։ Թանգարանի գլխավոր տնօրեն Ջիբրաիլ Նոկանդեի խոսքով, ցուցահանդեսը կազմակերպվել է Իրանի ազգային թանգարանի 80–ամյա հոբելյանի առթիվ։ Բացի այդ, հաջորդ ամիս թանգարանում կսկսվի Հարավային Կորեայի մշակութային հուշարձանների ցուցահանդես, իսկ ձմռանն Իրան կմեկնեն ավելի քան 60 ցուցանմուշներ Լուվրից։ -0-