Հայ պարողները 2–րդ տեղն են զբաղեցրել Գրոզնիի Մահմուդ Էսամբաևի անվան մրցույթ-փառատոնում

ԵՐԵՎԱՆ, 28 հոկտեմբերի. /Նովոստի–Արմենիա/. Ալեքսանդր Սպենդիարյանի անվան օպերայի և բալետի ազգային ակադեմիական թատրոնի բալետի արտիստներից կազմված խումբը զբաղեցրել է երկրորդ հորիզոնականը Գրոզնիում կայացած Մահմուդ Էսամբաևի անվան պարարվեստի միջազգային VII մրցույթ-փառատոնում, հայտնում է Երևանի օպերային թատրոնի մամուլի ծառայությունը։


Հայաստանը ներկայացրել են Ա. Սպենդիարյանի անվան օպերայի եւ բալետի ազգային ակադեմիական թատրոնի բալետի 4 արտիստ՝ Վահագն Մարգարյանը, Արթուր Գասոյանը, Սամվել Սերոբյանը և Պետրոս Սերոբյանը։ Արտիստներին մրցույթ-փառատոնին ներկայացրել է թատրոնի բալետային խմբի ղեկավար Բորիս Էմինյանը։

Հայ արտիստները ներկայացրել են երեք ժամանակակից պարային համարներ՝ Ռուբեն Մուրադյանի խորեոգրաֆիայով «Տրիո-Բրավո», Արսեն Մեհրաբյանի՝ «Փակուղի», Հովհաննես Դիվանյանի՝ «Թմբուկներ» և մեկ հայկական ժողովրդական պար։

Փառատոնի Գրան-պրիին արժանացել է Բելառուսը ներկայացնող պարային դուետը, առաջին հորիզոնականը զբաղեցրել է Չեչնիայի պարային խումբը, երրորդը՝ դարձյալ Բելառուսը։

Ս.թ հոկտեմբերի 15-19-ը Չեչնիայի մայրաքաղաք Գրոզնիում կայացած Մահմուդ Էսամբաևի անվան պարարվեստի միջազգային VII մրցույթ-փառատոնին մասնակցել է 96 պարող յոթ երկրներից և Ռուսաստանի 19 մարզերից։
–0—