Հայ դաշնակահարների դուետը հաղթել է «Պուտրա» դաշնակահարների միջազգային մրցույթում

ԵՐԵՎԱՆ, 8 դեկտեմբերի․ /Նովոստի-Արմենիա/․ Արթուր Գրիգորյան և Արմեն Պուչինյան դուետը «Պուտրա» դաշնակահարների միջազգային առցանց մրցույթում «Դաշնամուրային դուետ» անվանակարգում արժանացել է 1-ին մրցանակին։ Այս մասին հայտնում է ՀՀ Կրթության, գիտության, մշակույթի և սպորտի նախարարության մամուլի ծառայությունը։

«Պուտրա» դաշնակահարների միջազգային առցանց մրցույթն անցկացվել է նոյեմբերի 10-ից դեկտեմբերի 2-ը:

Միջազգային հանձնաժողովի կազմում ընդգրկված են եղել անվանի երաժիշտներ՝ Յեն Գոհ (Մալայզիա), Արմեն Բաբախանյան (Հայաստան), Ադամ Ջորջի (Հունգարիա), Լյու Դուկ Ան (Վիետնամ), Ջուլիան Ջակոբսոն (Մեծ Բրիտանիա) և Լու Ֆանգ Չիաթ (Մալայզիա): Մրցույթն անցկացվել է 7 անվանակարգերում, որոնց մասնակցել են 29 երկրների 243 երիտասարդ երաժիշտներ:

«Մեկնարկ» տաղանդի զարգացման նպատակային ծրագրի անդամները ևս իրենց գործուն մասնակցությունն են ունեցել մրցույթում՝ ցուցաբերելով փայլուն արդյունքներ: Այսպես՝ Արթուր Գրիգորյան և Արմեն Պուչինյան դուետը «Դաշնամուրային դուետ» անվանակարգում արժանացել է 1-ին մրցանակին, Էլեն Խաչիկյանը (դաշնամուր) «Intermediate» անվանակարգում՝ 2-րդ մրցանակին, Վարդան Գյոդակյանը (դաշնամուր) «Artist» անվանակարգում՝ 3-րդ մրցանակին: Նանե Խալաթյանն էլ (դաշնամուր) «Young artist» անվանակարգում արժանացել է 2-րդ մրցանակին:

«Նշենք նաև, որ մրցույթի հաղթող Արթուր Գրիգորյան և Արմեն Պուչինյան դուետը 2021 թ. աշնանը Մալայզիայի մայրաքաղաք Կուալա Լումպուրում կմասնակցի մրցույթի հաղթողների Գալա համերգին»,- ասվում է հաղորդագրության մեջ:-0-