ԵՐԵՎԱՆ, 20 մայիսի. /Նովոստի-Արմենիա/. «Ты супер!» նախագծի երկրորդ եթերաշրջանի հայ մասնակից Սաթենիկ Գևորգյանը երկրորդ կիսաեզրափակչում փայլուն կատարել է «Տիտանիկ» հոլիվուդյան ֆիլմի My heart will go on հայտնի սաունդթրեքը:
Կոմպոզիտոր Վիկտոր Դրոբիշը, գնահատելով կատարողի տաղանդը, ասել է. «Դու ամեն ինչ անթերի կատարեցիր, ամեն ինչ կատարյալ էր»:
Իգոր Կրուտոյը միաժամանակ նշել է, որ այսպիսի ստեղծագործությունների կատարումը մեծ պատասխանատվություն է ենթադրում, ավելացնելով, որ Սաթենիկի երգած նոտաներն անթերի էին, և նա գլուխ հանեց այդ բարդ ստեղծագործությունից:
Հայաստանի ներկայացուցիչ Սաթենիկը ժյուրիի և հաղորդավարի որոշմամբ անցել է նախագծի եզրափակիչ:
«Ты супер!» նախագծին մասնակցում են տաղանդավոր և այս կամ այն պատճառով առանց ծնողական խնամքի մնացած երեխաները Ռուսաստանից, Հայաստանից, Ադրբեջանից, Բելառուսից, Ուկրաինայից, Վրաստանից, Հարավային Օսեթիայից, Ղազախստանից, Մոլդովայից, Ղրղըզստանից և Էստոնիայից: -0-