Grammy-ի դափնեկիր Վենգերովի համերգը սկսվել է Հայաստանի պետական սիմֆոնիկ նվագախմբի ելույթով

ԵՐԵՎԱՆ, 26 ապրիլի./Նովոստի–Արմենիա/. Grammy-ի դափնեկիր, ջութակահար Մաքսիմ Վենգերովը հաջող ելույթ է ունեցել Մալթայում։ Նա մասնակցել է Մալթայի VI միջազգային երաժշտական փառատոնին, որն անցկացվում է մայրաքաղաք Վալետայում, հաղորդում է ՏԱՍՍ–ը։

Երեկոյի ընթացքում հնչել են Չայկովսկու ստեղծագործությունները։ Համերգը բացել է Հայաստանի պետական սիմֆոնիկ նվագախումբը` ՀՀ վաստակավոր արտիստ Սերգեյ Սմբատյանի գլխավորությամբ։ Հնչել է սյուիտ «Կարապի լիճը» բալետից։

Համերգից հետո հանդիսատեսը չէր շտապում հեռանալ` խնդրելով Վենգերովի ինքնագիրը։

Մալթայի VI միջազգային երաժշտական փառատոնն անցկացվում է Վալետայում ապրիլի 15–ից։ Փառատոնի շրջանակում արդեն ելույթ են ունեցել դիրիժոր և ջութակահար Դմիտրի Սիտկովեցկին, դաշնակահար Նիկոլայ Լուգանսկին և Դենիս Կոժուխին, երգչուհի Լյուբով Կազարնովսկայան, ջութակահար Մաքսիմ Վենգերովը։ Միջոցառման շրջանակում ելույթ կունենան ջութակահար Ռեյ Չենը, դաշնակահար Գրիգորի Սոկոլովը։ Ակնկալվում է նաև լեհ կոմպոզիտոր Քշիշտոֆ Պենդերեցկու այցը։

Փառատոնի շրջանակում անցկացվում է նաև երիտասարդ դաշնակահարների մրցույթ։ Հեղինակավոր ժյուրիի կազմում ներառված են դաշնակահարներ Վլադիմիր Օվչինիկովն ու Դմիտրի Բաշկիրովը, Մոսկվայի կոնսերվատորիայի ռեկտոր Ալեքսանդր Սոկոլովն ու այլք։ Ժյուրիի կազմը գլխավորում է դիրիժոր և դաշնակահար Կոնստանտին Օրբելյանը։

Ապրիլի 29–ին կանցկացվի մրցույթի եզրափակիչ փուլը, որի մրցանակային ֆոնդն աննախադեպ է` 200 հազար եվրո, որից Գրան–պրիի մրցանակակիրը կստանա գումարի ուղիղ կեսը։–0–