Երևանում Այվազովսկու ցուցահանդեսն այցելությունների ռեկորդ է սահմանել

ԵՐԵՎԱՆ, 25 սեպտեմբերի. /Նովոստի–Արմենիա/. Հայազգի աշխարհահռչակ ծովանկարիչ Հովհաննես (Իվան) Այվազովսկու ծննդյան 200–ամյակին նվիրված ցուցահանդեսը, որը բացվել է Հայաստանի ազգային պատկերասրահում սեպտեմբերի 15–ին, այցելությունների թվով ռեկորդային է դարձել։

«Այս ընթացքում ցուցահանդես է այցելել մոտ 4 հազար մարդ, որոնցից 600–ը ներկա է եղել ցուցահանդեսի բացմանը։ Ազգային պատկերասրահն այցելություններից 4 մլն 145 հազար դրամի ($8670) շահույթ է ստացել»,– երկուշաբթի լրագրողներին ասաց Հայաստանի մշակույթի նախարար Արմեն Ամիրյանը։

Նրա խոսքով, օրական ցուցահանդես է այցելում մոտ 800 մարդ, ինչը Հայաստանում բացարձակ ռեկորդ է։

Ցուցահանդեսում ներկայացված են 52 գեղանկարչական և 26 գծանկարային կտավներ, մեկ դեկորատիվ աշխատանք և մեկ քանդակ, ինչպես նաև Այվազովսկու կյանքի և ստեղծագործության հետ կապված 26 փաստաթուղթ։ Կոնցեպցիայի կենտրանական մասը հիմնված է «Քաոս. Աշխարհի արարում» կտավի վրա, որը Հայաստանում ցուցադրվում է առաջին անգամ։

Ցուցահանդեսը կտևի մինչև հաջորդ տարվա հունվարի 15–ը։ -0-