Երևանի մնջախաղի թատրոնն իր տունը ձեռք բերեց

ԵՐԵՎԱՆ, 15 փետրվարի. /Նովոստի-Արմենիա/. Երևանի մնջախաղի թատրոնը չորեքշաբթի ձեռք բերեց իր տունը։ Խորհրդանշական «ոսկե» բանալին թատրոնի գեղարվեստական ղեկավար Ժիրայր Դադասյանին հանձնեց Հայաստանի մշակույթի նախարար Արմեն Ամիրյանը։

Ամբողջ կիսակատակ արարողությունը վերածվեց իսկական ներկայացման։ Դրանից մեկ օր առաջ մշակույթի նախարարն ասել էր. «Մենք կամ պետք է ձեզ ցրենք, կամ տարածք գտնենք»։ Դրանից հետո նա հրավիրեց թատրոնի դերասաններին հավաքվել Երևանի Հրաչյա Ղափլանյանի անվան դրամատիկական թատրոնի մոտ` անակնկալ խոստանալով։ Նշված ժամին ժամանած Դադասյանն ասել էր, որ իրեն զանգահարել և հետաքրքրվել են, թե ճիշտ է, արդյո՞ք, որ դրամատիկական թատրոնը ցրում են, իսկ շենքը նվիրում մնջախաղի թատրոնին։



Սակայն հետաքրքրասեր բաժանորդը սխալվել էր, հայ մնջախաղացների նոր տունը գրքի նախկին պալատն է, որը գտնվում է դրամատիկական թատրոնի հարևանությամբ։

«Գրքի ազգային պալատը միավորված էր Ազգային գրադարանի հետ, և Հայաստանի նախագահի հանձնարարականով որոշում է ընդունվել պալատի ազատված տարածքը փոխանցել թատրոնին»,– ասաց Ամիրյանը։

Ըստ նրա, թատրոնի նոր տարածքի նորոգման և վերականգնման միջոցները կհատկացվեն պետական բյուջեից։ Ծրագրվում է, որ նորոգումը կավարտվի այս տարի, և միայն դրանից հետո թատրոնը պաշտոնապես կբացվի։

Դադասյանն իր հերթին հիշեցրեց, որ արդեն քսան տարի խոսում է սեփական շենքի բացակայության մասին։ «Այժմ կկարողանանք իրականացնել մեր ծրագրերը»,– ասաց գեղարվեստական ղեկավարը։



Նա նաև խոստացավ, որ մնջախաղի թատրոնի առաջին բեմադրությունը նվիրված կլինի գրքի և ընթերցանության թեմային, քանի որ Գրքի ազգային պալատի նախկին շենքում յուրահատուկ աուրա է տիրում։

1974 թվականին հիմնված Երևանի մնջախաղի պետական թատրոնը հայկական միակ թատրոնն է, որն իր հիմնադրման պահից երբեք սեփական շենք չի ունեցել։ Վերջին տարիներին թատրոնի ներկայացումները բեմադրվել են Պատանի հանդիսատեսի թատրոնում։ -0-