«Մանկական Եվրատեսիլ-2015»-ի հայաստանյան երգի և տեսահոլովակի պրեմիերան կայացավ ՀՀՀ-ում (ՏԵՍԱՆՅՈՒԹ)

ԵՐԵՎԱՆ, 10 հոկտեմբերի. /Նովոստի-Արմենիա/.  «Մանկական Եվրատեսիլ-2015»-ի հայաստանյան երգի և տեսահոլովակի պրեմիերան կայացավ շաբաթ օրը Հայաստանի հանրային հեռուստաընկերությունում:

Տեսահոլովակում Միկան (Միքայել Վարոսյան) ներկայանում է մերօրյա կուպիդոնի կերպարով, ով նոյեմբերի 21-ին եվրատեսիլյան երկրպագուներին կներկայանա ռոքնռոլ ժանրի երգով:

Մրցութային «LOVE» երգի տեսահոլովակում ներկայացվում է սիրո և երջանկության մեծ ընկերություն, որտեղ Միկան՝ գլխավոր կուպիդոնը, և նրա աշխատակիցները մշակում և կառավարում են աշխարհի սիրային բոլոր հարցերը Կուպիդոնի գերժամանակակից գրասենյակից, որը տեղակայված է ստեղծագործ երեխաների մոլորակում՝ «Թումո» ստեղծարար տեխնոլոգիաների կենտրոնում: Միկան և նրա օգնականները փորձում են կազմակերպել եւ կարգավորել սիրուն առնչվող բոլոր հարցերը, ինչպես նաև համերաշխություն և բարություն տարածել ողջ աշխարհում:

Կուպիդոնի աշխատանքը մեծ պատասխանատվություն և ուշադրություն է պահանջում, իսկ կարևորագույն այդ առաքելությունն իրականացնելիս Միկային կօգնի նրա ավագ գործընկերը՝ «Եվրատեսիլ-2014»-ի հայաստանյան ներկայացուցիչ Արամ MP3-ին:

Երգի երաժշտության հեղինակը Լիլիթ Նավասարդյանն է, խոսքերի հեղինակը՝ Ավետ Բարսեղյանը, երաժշտության և խոսքերի համահեղինակն է Միքայել Վարոսյանը:

Տեսահոլովակը նկարահանել է ռեժիսոր Արթուր Մանուկյանը, օպերատորն է Կարեն Ստեփանյանը, իսկ ոճաբանը՝ Արամ Նիկոլյանը:

Այս տարի «Մանկական Եվրատեսիլ 2015»-ն կանցկացվի նոյեմբերի 21-ին Բուլղարիայի մայրաքաղաք Սոֆիայում, Armeec համերգասրահում «Discover» («Բացահայտիր») կարգախոսով:

Հայաստանը «Մանկական Եվրատեսիլին» մասնակցում է 2007թ.–ից։ Առաջին անգամ մրցույթին Հայաստանը ներկայացրել է «Արևիկ» մանկական խումբը` «Երազանք» երգով` զբաղեցնելով երկրորդ տեղը։ 2008թ.–ին Մոնիկա Մանուչարյանը ներկայացել է «Իմ երգի հնչյունները» երգով և զբաղեցրել ութերորդ տեղը։ 2009թ.–ին Լաուրա Հայրապետյանն իր «Բարսելոնա» երգով նվաճեց երկրորդ տեղը`այդ տեղը կիսելով Ռուսաստանի ներկայացուցիչ Եկատերինա Ռյաբովայի հետ։

Մեկ տարի անց «Մանկական Եվրատեսիլ» մրցույթին Մինսկում հաղթող ճանաչվեց Հայաստանը ներկայացնող ԼՂՀ 12–ամյա քաղաքացի Վլադիմիր Արզումանյանը, իսկ 2011թ.–ին մրցույթն անցկացվեց Երևանում, որտեղ Հայաստանը ներկայացրեց պատանի երգչուհի Դալիթան։ Compass Band հայկական խումբը, որը 2012թ.–ին Ամստերդամում ներկայացրեց Հայաստանը, զբաղեցրեց երրորդ տեղը։

2013 թվականին Հայաստանի ներկայացուցիչ Մոնիկա Ավանեսյանը Կիևում անցկացված մրցույթում զբաղեցրեց 6–րդ տեղը։ –0–-