ԵՐԵՎԱՆ, 9 օգոստոսի./Նովոստի-Արմենիա/. Մոսկվայում սպասում են դուդուկի արքա Ջիվան Գասպարյանի ժամանելուն, հայտնում է НТВ հեռուստաալիքի կայքը:
Աշխարհահռչակ երաժիշտը համերգ կտա ВДНХ-ի Կանաչ թատրոնում օգոստոսի 14-ին:
«Մի օր ընտրելով ամենահանելուկային երաժշտական գործիքներից մեկը` արտիստը կարողացավ ճանաչելի դարձնել այս գործիքը` հյուրախաղեր ողջ աշպարհով, լեփ-լեցուն համերգային դահլիճներ: Ծիրանի փողի ելևէջները լսելու էին գնում ոչ միայն հայկական բանահյուսության երկրպագուները, այլ նաև համաշխարհային մեծության քաղաքական և մշակութային գործիչներ»,- նշում է պարբերականը:
Նրան անվանում են համաշխարհային երաժշտության լեգենդ, ում տաղանդը գրավել է Էնիո Մորիկոնեին, Մարտին Սկորսեզեին, Ջոն Քենեդուն և Եղիսաբեթ Երկրորդին, բայց հարազատ Հայաստանում նա բոլորի համար Ջիվան պապ է: Ամառն անցկացնում է Երևանից ոչ հեռու գտնվող ամառանոցում, բոստան է մշակում և զբաղվում ծիրանի օղու պատրաստմամբ, նշում է պարբերականը:
Ջիվան պապի ողջ կենսագրությունը երաժշտության մեջ է: Սկսել է նվագել 6 տարեկանում` ինքնուրյույն` զմայլված համր կինոն հնչունավորող դաշնակահարների խաղով: Պատերազմական, քաղցած մանկություն է ունեցել: 1947 թվականին, երբ պատանի Ջիվանը ելույթ էր ունեցել Մոսկվայում և անձամբ Իոսիֆ Ստալինից «Հաղթանակ» ժամացույց էր նվեր ստացել, փոխանակել էր այն սննդամթերքով:
Իսկ արդեն է 10 տարի անց Գասպարյանը կոլեկտիվով հյուրախաղեր էր տալիս ամբողջ աշխարհով մեկ: Ելույթ էր ունենում մոլորակի ամենահայտնի բեմերում: Ամերիկայում, ասում է, ԿՀՎ գործակալներն առաջարկում էին նույնիսկ մնալ` փախնել Խորհրդային միությունից: Հրաժարվեց: Բայց 1980-ականների վերջում` Ղարաբաղյան հակամարտության տարիներին, մեկնել էր Հոլիվուդ ընկերների հրավերով, քանի որ ընտանիքը պետք էր կերակրել:
«Դա մի ժամանակ էր, երբ ինչ-որ մեկը մահանում էր` ուրախանում էին, որովհետև երկու ժամ հոսանք կլիներ: Ինչպե՞ս կարելի է ապրել այդպիսի ժամանակներում»,- նշում է երաժիշտը:
Պատերազմ ու երկրաշարժ վերապրած հայրենիքի այդ ցավը նա մերկացրեց ողջ աշխարհի առջև երաշժտության միջոցով: Եվ այնպես սուր, որ դուդուկը դարձավ հայ ժողովրդի խորհրդանիշ: ՅՈՒՆԵՍԿՕ-ն նրան պարգևատրել է չորս ոսկե մեդալներով: Ջիվան Գասպարյանի հետ աշխատելը պատիվ են համարում Փիթեր Գեբրիելը, Սթինգը, Լայնըլ Ռիչին, Շառլ Ազնավուրը, Բրայըն Մեյը և այլ հայտնի դեմքեր: Ռուսաստանում Ջիվան Գասպարյանը նվագում է ինչպես սիմֆոնիկ նվագախմբերի, այնպես էլ ռոքերների հետ: Հոլիվուդի ռեժիսորները հրավիրում են նրան երաժշտություն գրել ֆիլմերի համար: «Գլադիատոր» ֆիլմի սաունդթրեքի համար Ջիվան Գասպարյանն արժանացել է «Ոսկե գլոբուսի»:
Այժմ լեգենդար երաժիշտն ապրում է Երևանում: Օգոստոսի 14-ին կմեկնի Մոսկվա համերգ տալու: Ռուսաստանը Ջիվան պապն անվանում է երկրորդ տուն, ասվում է Երևանում մաեստրոյին հյուրընկալված НТВ թղթակից Իննա Օսիպովայի ռեպորտաժում: -0-
