ԵՐԵՎԱՆ, 3 օգոստոսի. /Նովոստի–Արմենիա/. «Ոսկե ծիրան» Երևանի միջազգային կինոփառատոնի տնօրեն Հարություն Խաչատրյանը շնորհակալություն է հայտնել «Նովոստի Արմենիա» լրատվական գործակալության ղեկավարությանն ու աշխատակազմին կինոփառատոնը լայնորեն լուսաբանելու համար։
«Ոսկե ծիրան»–ի կայացման բոլոր տարիներին կինոփառատոնը հատկապես կարևորել է առաջատար լրատվամիջոցների հետ սերտ համագործակցությունը։ Այս նամակով իմ և «Ոսկե ծիրան»–ի աշխատակազմի անունից շնորհակալություն եմ հայտնում «Նովոստի Արմենիա» լրատվական գործակալությանը 12-րդ «Ոսկե ծիրան» կինոփառատոնը լայնորեն լուսաբանելու համար», – գրված է Խաչատրյանի շնորհակալական նամակում։
«Ոսկե ծիրան» 12–րդ միջազգային փառատոնը անցկացվել է Երևանում այս տարվա հուլիսի 12–19–ը։ Այս տարի կազմկոմիտեն փառատոնին մասնակցելու 1.6 հազար հայտ էր ստացել աշխարհի 105 երկրներից։
«Ոսկե ծիրան» միջազգային կինոփառատոնը Երևանում անցկացվում է 2004թ.-ից և համարվում է տարածաշրջանի ամենաճանաչված փառատոներից մեկը:
Այդ տարիների ընթացքում Հայաստան են ժամանել հայտնի դերասաններ և ռեժիսորներ, որոնց թվում նաև` գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։
2010 թվականին Երևանի կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին:
«Նովոստի Արմենիա» ՄԼԳ–ն «Ոսկե ծիրան» 12–րդ միջազգային փառատոնի տեղեկատվական հովանավորն էր։ -0-
