«Յուրյան դարաշրջանի աշխարհը» դրամահավաքով դարձել է երրորդը կինոյի պատմության մեջ

ԵՐԵՎԱՆ, հուլիսի 23. /Նովոստի–Արմենիա/. Քոլին Թրևորոուի «Յուրյան դարաշրջանի աշխարհ» ֆիլմը մտել է պատմության մեջ ամենաշատ գումար հավաքած ֆիլմերի եռյակի մեջ։ Տվյալ պահին ֆիլմի դրամահավաքը կազմում է 1,522 մլրդ դոլար, ինչն օգնել է ֆիլմին առաջ անցնել «Վրիժառուներից», որը 2012–ին հավաքել էր 1,52 մլրդ, հաղորդում է Lenta.ru–ն` հղում անելով Variety–ին։

Հրատարակությունը նշում է, որ բլոկբասթերը, ամենայն հավանականությամբ, կմնա երրորդ հորիզոնականում, չնայած նրան, որ պետք է ցուցադրվի նաև Ճապոնիայում։ Պատմության մեջ ամենաշատ գումար հավաքած ֆիլմերի` «Ավատարի» և «Տիտանիկի» դրամահավաքները կազմում են, համապատասխանաբար, 2,79 և 2,18 մլրդ դոլար։

Հյուսիսային Ամերիկայի տարածքում «Յուրյան դարաշրջանի աշխարհն» արդեն հավաքել է 614,3 մլն դոլար` չորրորդ ֆիլմը դառնալով «Ավատարից», «Տիտանիկից» և «Վրիժառուներից» հետո, որն անցել է 600 մլն դոլար սահմանագիծը։

«Յուրյան դարաշրջանի աշխարհը» դարձել է Universal ստուդիայի երկրորդ ֆիլմը, որը 2015թ.–ին մտել է պատմության մեջ ամենաբարձր դրամահավաքով ֆիլմերի հնգյակի մեջ։ Ավելի վաղ դա հաջողվել էր «Ֆորսաժ 7»–ին` 1,51 մլրդ դոլարով. դա հինգերորդ բացարձակ ցուցանիշն է։ Երկու ֆիլմերը Universal–ի պատմության մեջ միակն են, որոնք հաղթահարել են 1 միլիարդ դոլարի սահմանագիծը։

Քոլին Թրևորոուի ֆիլմում, որտեղ «Յուրյան դարաշրջանի այգի» օրիգինալ եռագրությունում իրադարձությունները զարգանում են 15 տարի անց, գլխավոր դերերում հանդես են եկել Քրիս Փրաթը և Բրայս Դալաս Հովարդը։