Ռոբեր Գեդիկյանը կգլխավորի Երևանի «Ոսկե ծիրան» կինոփառատոնի խաղարկային ֆիլմերի ժյուրին

ԵՐԵՎԱՆ, 8 հուլիսի. /Նովոստի–Արմենիա/. Ֆրանսահայ հայտնի պրոդյուսեր, ռեժիսեր, սցենարիստ և դերասան Ռոբեր Գեդիկյանը կգլխավորի Երևանի «Ոսկե ծիրան» միջազգային կինոփառատոնի խաղարկային ֆիլմերի ժյուրին, չորեքշաբթի լրագրողներին ասաց փառատոնի գեղարվեստական ղեկավար Սուսաննա Հարությունյանը։

«Ոսկե ծիրան» միջազգային 12–րդ կինոփառատոնը կանցկացվի Երևանում հուլիսի 12-19–ը։

Գեդիկյանի և մի շարք այլ հայտնի կինոգործիչների մասնակցությունը փառատոնին հնարավոր է դարձել, այդ թվում` Հայաստանում Ֆրանսիայի դեսպանության օժանդակության շնորհիվ։

Փառատոնը կբացվի Գեդիկյանի «Մի խենթի պատմություն» (Une Histoire de Fou) ֆիլմի ցուցադրությամբ։ Ավելի վաղ այդ ֆիլմն ընդգրկվել է Կաննի կինոփառատոնի հատուկ ցուցադրության մեջ։

««Ոսկե ծիրանը» միջազգային լայն կապեր ունի, որոնք արդյունավետ կլինեին, եթե Հայաստանի արտասահմանյան պետությունների դեսպանություններն ավելի ակտիվ մասնակցեին դրան»,– նշեց Հարությունյանը։

Հայաստանում Ֆրանսիայի արտակարգ և լիազոր դեսպան Ժան Ֆրանսուա Շարպանտիեն իր հերթին նշեց, որ «Ոսկե ծիրանի» շրջանակում կանցկացվի «Ֆրանսիական նոր կինո» ծրագիրը, որն ընդգրկում է վերջին ժամանակ Ֆրանսիայում նկարահանված ֆիլմերի ցուցադրություն։

«Այդ կինոփառատոնը լավ հնարավորություն է ընձեռում հայ հանդիսատեսին ծանոթանալու համաշխարհային կինոարվեստին»,– ասաց Շարպանտիեն։

Մամուլի ասուլիսին ներկա գտնվող Երևանում գիտության և մշակույթի ռուսական կենտրոնի տնօրեն Մարկ Կալինինն ընդգծեց, որ այն փոքր ժամանակահատվածում, երբ անցկացվում է «Ոսկե ծիրանը», Հայաստանը կդառնա համաշխարհային կինոյի համաշխարհային կենտրոն, ամբողջ աշխարհի լավագույն դերասանների և ռեժիսորների ձգողական խոշորագույն կենտրոն։

«Հայաստանում սկսվում է իսկական կինեմատոգրաֆիական տոն, երբ Երևան են ժամանում հայտնի դերասաններ, ռեժիսորներ, կինոքննադատներ, ովքեր մեկ շաբաթվա ընթացքում կմասնակցեն մրցութային ծրագրին, կցուցադրեն իրենց հիանալի ֆիլմերը, կքննարկեն դրանք և հաճույք կպարգևեն այդ իսկապես միջազգային կինոփառատոնին»,– ասաց Կալինինը։

Նա խոստովանեց, որ ռուսների համար շատ հաճելի է մասնակցել այդ ծրագրին։ «Յուրաքանչյուր անվանակարգում կլինեն ռուսական ֆիլմեր, որոնք կպայքարեն մրցանակների համար, և հույս ունենք, որ մի շարք ռուսական ֆիլմեր կստանան բարձր պարգևներ տարբեր անվանակարգերում»,– ասաց Կալինինը։

«Մշակույթի և արվեստի օգնությամբ կարելի է այս աշխարհն ավելի բարի և լավը դարձնել... Շատ կարևոր է, որ Հայաստան նաև կժամանեն ռուս լրագրողներ, կինոքննադատներ, որ ռուս հեռուստադիտողին հասցնի այն, ինչ կատարվում է Երևանի կինոփառատոնի ժամանակ»,– ասաց Կալինինը։

«Ոսկե ծիրանի» շրջանակում ցուցադրվող բոլոր ֆիլմերի ամբողջական ցուցակը կտեղադրվի փառատոնի պաշտոնական կայքում` http://www.gaiff.am։

«Ոսկե ծիրան» միջազգային կինոփառատոնը Երևանում անցկացվում է 2004թ.-ից և համարվում է տարածաշրջանում ամենաճանաչվածներից մեկը:

Այդ տարիների ընթացքում Հայաստան են ժամանել հայտնի դերասաններ և ռեժիսորներ, որոնց թվում նաև գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։ 2010 թվականին Երևանի կինոփառատոնն արժանացավ կինոյի, հեռուստատեսության և սպորտի միջազգային Ficts Plate D'honneur միության գլխավոր մրցանակին:

Այս տարվա փառատոնի համաշխարհային կինոյի աստղեր կդառնան իտալացի դերասանուհի Օրնելլա Մուտին, ամերիկացի դերասանուհի Նաստասյա Կինսկին։