«Ազգային պատկերասրահ» XI փառատոնը դեռ բազմաթիվ անակնկալներ է պատրաստում

ԵՐԵՎԱՆ, 24 հունիսի. /Նովոստի–Արմենիա/. «Ազգային պատկերասրահ» XI միջազգային փառատոնը հայ ունկնդրի համար դեռ բազմաթիվ անակնկալներ ունի, «Նովոստի–Արմենիա» գործակալությանն ասաց «Արվեստների պատկերասրահ» մշակութային հիմնադրամի նախագահ, փառատոնի հիմնադիր Մարիամ Շահինյանը։

«Այսօր մենք ներկայացրել ենք կամերային երաժշտության երեկո թավջութակահար Հասմիկ Վարդանյանի և դաշնակահար Նառա Ավետիսյանի մասնակցությամբ, ով Քլիվլենդում աշակերտում է աշխարհահռչակ հայտնի հայ դաշնակահար Սերգեյ Բաբայանին։ Համերգը հետաքրքիր է նրանով, որ առաջին անգամ Հասմիկն ու Նառան ելույթ կունենան միասին»,– ասաց Շահինյանը։

Ըստ նրա փառատոնն ավանդաբար շարունակում է նոր անուններ ներկայացնել, նոր ծրագրեր և ստեղծագործական միություններ։

«Պատահական չէ նաև այն ստեղծագործությունների ընտրությունը, որոնք կներկայացնեն աղջիկները։ Դա և Շոպեն է, և Բրամս, և Շոստակովիչ, և Սոլիմա»,– ասաց Շահինյանը։

Նա հայտնեց նաև, որ փառատոնի շրջանակում հունիսի 27–ին Երևանում ելույթ կունենա ռուս բայանահար Իոսիֆ Պուրիցը։ Իսկ փառատոնի փակմանը նվիրված համերգն իսկական տոն կդառնա վոկալի սիրահարների համար, քանի որ ելույթ կունենան Վարդուհի Խաչատրյանը (մեցո սոպրանո, Շվեյցարիա), Լիպարիտ Ավետիսյանը (տենոր), Դավիթ Բաբայանցը (բարիտոն), Արմեն Աղաջանյանը (դաշնամուր)։ Այն կկայանա հուլիսի 4–ին։

Փառատոնն անցկացնում է «Արվեստների պատկերասրահ» մշակութային հիմնադրամը` հանրապետության մշակույթի նախարարության աջակցությամբ։ Բոլոր համերգներն անցկացվում են Հայաստանի ազգային պատկերասրահի որմնանկարների սրահում։

2005 թվականին հիմնված «Ազգային պատկերասրահ» փառատոնը 2008 թվականից ընդգրկված է մշակույթի նախարարության պետական օժանդակության ծրագրերում։

Փառատոնի գլխավոր գործընկերը VivaCell-MTS հեռահաղորդակցային օպերատորն է։ «Նովոստի–Արմենիա» գործակալությունը փառատոնի տեղեկատվական հովանավորն է։ -0-