Արդեն հայտնի են Արամ Խաչատրյանի անվան XI միջազգային մրցույթի եզրափակիչ փուլ անցած երաժիշտների անունները

ԵՐԵՎԱՆ, 11 հունիսի./Նովոստի–Արմենիա/. Երեկ երեկոյան հայտնի են դարձել Արամ Խաչատրյանի անվան 11-րդ միջազգային մրցույթի եզրափակիչ փուլ անցած ջութակահարների անունները։ Մրցանակային տեղերի համար կպայքարեն 5 մասնակիցներ՝ Դավիթ Արդուխանյանը (Ռուսաստան), Պիեռ Ֆրապիերը (Ֆրանսիա), Մարիամ Վարդանյանը (Հայաստան), Անդրեա Օբիսոն (Իտալիա), Իվա Միլետիչը (Սերբիա)։

Հունիսի 12-ին և 13-ին մասնակիցները երրորդ փուլում Ալեքսանդր Սպենդիարյանի անվան օպերայի և բալետի ազգային ակադեմիական թատրոնում Հայաստանի պետական երիտասարդական նվագախմբի հետ կկատարեն Արամ Խաչատրյանի Ջութակի կոնցերտը և Մոցարտի Ջութակի թիվ 3 կոնցերտը։

Արամ Խաչատրյանի անվան միջազգային մրցույթն անցկացվում է ՀՀ մշակույթի նախարարության, «Արամ Խաչատրյան-մրցույթ» մշակութային հիմնադրամի և Երևանի Կոմիտասի անվան պետական կոնսերվատորիայի համատեղ ջանքերի շնորհիվ և անցկացվում է ՀՀ առաջին տիկին Ռիտա Սարգսյանի բարձր հովանու ներքո, ով մրցույթի հոգաբարձուների խորհրդի պատվավոր նախագահն է: Այս տարի մրցույթին մասնակցում է շուրջ 30 ջութակահար` աշխարհի 17 երկրից։-0-