ԵՐԵՎԱՆ, 27 մայիսի. /Նովոստի–Արմենիա/. Հայաստանն առաջին անգամ կմասնակցի Նյու Յորքի խոշորագույն «Book Expo-America» գրքի ցուցահանդեսին, որը կանցկացվի մայիսի 27-29-ը, չորեքշաբթի լրագրողներին ասաց Հայաստանի մշակույթի փոխնախարար Ներսես Տեր–Վարդանյանը։
«Հայկական տաղավարում կներկայացվի ավելի քան 250 գիրք, որոնց մեծամասնությունը` օտար լեզվով», – ասաց Տեր–Վարդանյանը։
Նա նաև նշեց, որ այս տարի Հայաստանի մասնակցությունը միջազգային գրքին վերաբերող ծրագրերին ծավալներով և բովանդակությամբ աննախադեպ էր, քանի որ արդեն իսկ 2015 թ. առաջին 5 ամիսների ընթացքում Հայաստանը մասնակցել է ութ միջազգային գրքի ցուցահանդեսի և տոնավաճառի։ «Համեմատության համար կարող եմ նշել, որ ամբողջ 2014 թ. ընթացքում մեր երկիրը մասնակցել է վեց արտասահմանյան գրքի ցուցահանդեսի և տոնավաճառի», – ընդգծեց Տեր–Վարդանյանը։
Նրա խոսքերով` առաջին ցուցահանդեսը, որում ներկայացել է Հայաստանն այս տարի, տեղի է ունեցել փետրվարին Մինսկում, այնուհետև մարտին Հայաստանի ներկայացուցիչները մասնակցել են գրքի միջազգային տոնավաճառին Փարիզում, իսկ ապրիլին` Ալմա Աթայում և Լոնդոնում։
Մայիսին Հայաստանը մասնակցել է գրքի միջազգային տոնավաճառների Վարշավայում, Սալոնիկում և Թեհրանում։
«Տարբեր միջազգային ցուցահանդեսներին մասնակցությունն առաջին հերթին օգնում է ներկայացնել Հայաստանը և հայկական գրականությունը օտարազգի ընթերցողներին և հրատարակիչներին։ Այսպիսի միջոցառումները կարևոր են նաև հեղինակային իրավունքի պայմանավորվածությունների ձեռք բերման առումով, և խոսքն ինչպես հայերեն թարգմանված օտարալեզու գրքերի, այնպես էլ հակառակի մասին է», – նշեց փոխնախարարը։
Նա ավելացրեց, որ այս տարի մեկ այլ խոշորագույն գրական միջոցառումներից էր «Գրական տապան. ապրիլ» փառատոնը, որը անցկացվեց Հայաստանում ապրիլի 20-29-ը և նվիրված էր Հայոց ցեղասպանության 100-րդ տարելիցին։
«Փառատոնի ընթացքում տեղի ունեցավ 123 գրքի շնորհանդես։ Մինչ օրս «Գրական տապան» փառատոնը Հայաստանում այցելել է մոտ 90 գրող 38 երկրից», – նշեց Տեր–Վարդանյանը։ -0-
