Հունիսի 3–6–ը Երևանում կանցկացվի «Օսեթիայի մշակույթի օրերը Հայաստանում» խորագրով արվեստների միջազգային փառատոնը
ԵՐԵՎԱՆ, 26 մայիսի. /Նովոստի–Արմենիա/. Հյուսիս–կովկասյան դաշնային օկրուգի սուբյեկտների միջազգային մշակութային հաղորդակցության նախագծի շրջանակում Երևանում հունիսի 3–6–ը կանցկացվի «Օսեթիայի մշակույթի օրերը Հայաստանում» խորագրով արվեստների միջազգային փառատոնը, նշվում է ՀՀ–ում ՌԴ դեսպանատան պաշտոնական էջում։
Նախագիծն իրականացնում է Հյուսիսային Օսեթիա–Ալանիա Հանրապետության պարուսույցների միությունը` Ռուսաստանի մշակույթի նախարարության և Հյուսիսային Օսեթիա–Ալանիա Հանրապետության աջակցությամբ։
Մշակույթի օրերի միջոցառումների ցանկում ներառված են Հյուսիսային Օսեթիա–Ալանիա Հանրապետության «Ալան» պարի համույթի մենահամերգը, որն արժանացել է Ժողովուրդների բարեկամության ակադեմիական շքանշանին, ՌԴ կառավարության մշակույթի ոլորտի մրցանակին, Ֆրանսիայի Դիժոն քաղաքում անցկացված Հինգ մայրցամաքների միջազգային փառատոնի ոսկե մեդալին։ Համույթը համառուսական և միջազգային մրցույթների հաղթող է, Կոստ Խետագուրովի անվան պետական մրցանակի դափնեկիր, արժանացել է «Ոսկե Ապոլլոն» մրցանակին։
«Մշակութային նախագիծը «կզարդարի» արվեստի վարպետների` Հյուսիսային Օսեթիա–Ալանիա Հանրապետության օպերայի և բալետի ազգային պետական թատրոնի մենակատարների համերգը, որի գեղարվեստական ղեկավարն է Ռուսաստանի, Ուկրաինայի և Հյուսիսային Օսեթիա–Ալանիայի ժողովրդական արտիստ Լարիսա Գյորգիևան», – նշվում է հաղորդագրության մեջ։
Մշակույթի օրերի համերգային ծրագրի շրջանակում կկազմակերպվեն վոկալի, ժողովրդական–բեմական պարի և դերասանական վարպետության դասընթացներ, որոնք կվարեն Լարիսա Գյորգիևան, ՌԴ վաստակավոր արտիստ, «Ալան» համույթի գեղարվեստական ղեկավար Էլբրուս Կուբալովը, Հյուսիսային Օսեթիա–Ալանիայի ժողովրդական արտիստ, Օպերայի և բալետի ազգային պետական թատրոնի տնօրեն Անատոլի Գալաովը։
Նախագծի շրջանակում կկազմակերպվի դեկորատիվ–կիրառական արվեստի ցուցահանդես, որի ժամանակ կներկայացվեն «Ասիկ» ընկերության վարպետների կողմից պատրաստված ազգային տարազներով կոլեկցիոն տիկնիկներ (ղեկավարն է Զալինա Ցախիլովան), ինչպես նաև «Ֆանդիր» ԲԲԸ—ի վարպետների կողմից պատրաստված ազգային օսեթական ձեռագործ երաժշտական գործիքներ, կներկայացվեն նաև «Իզոլդա» ընկերության բացառիկ ազգային տարազները (ղեկավարն է Իզոլդա Գոգիչաևան)։
«Հայաստանում նախատեսված Օսեթիայի մշակույթի օրերը թույլ կտան զգալիորեն ակտիվացնել մշակութային փոխանակումը երկու երկրների միջև, պայմաններ կստեղծեն բարեկամական կապերի ամրապնդման և միջազգային մշակութային համագործակցության հետագա զարգացման համար», – նշվում է հաղորդագրության մեջ։
Միջազգային փառատոնը Հայաստանում առաջին անգամ է անցկացվում։ –0–
