Ցեղասպանության նկատմամբ հանրային ուշադրության պակասը նոր ողբերգությունների է հանգեցրել. Բեռնար Վերբեր

ԵՐԵՎԱՆ, 23 ապրիլի. /Նովոստի–Արմենիա/. Հայոց ցեղասպանության նկատմամբ հանրային ուշադրության պակասը նոր ողբերգությունների է հանգեցրել, օրինակ, Հոլոքոստը, և վստահություն չկա, որ նման երևույթներ չեն լինի ապագայում, ասաց ֆրանսիացի գրող և փիլիսոփա Բեռնար Վերբերը «Գրական տապան. ապրիլ» ամենամյա միջազգային փառատոնի ընթացքում։

Գրողի կարծիքով` երևույթի ըմբռնման համար անհրաժեշտ է հասկանալ սկզբնապատճառները, որպեսզի նմանատիպ երևույթ չլինի հետագայում։ «Բազմաթիվ մարդիկ բավարար չեն տեղեկացված կատարվածի մասին, և անհրաժեշտ է լուսավորել մարդկանց, հատկապես երիտասարդ սերնդին, ում պարտավորությունն է` համախմբվել և թույլ չտալ այդպիսի ողբերգություններ հետագայում»,– ասաց Վերբերը։

«Պետք չէ մոռանալ անցյալը, բայց նաև անհրաժեշտ է միշտ նայել դեպի ապագա»,– ավելացրեց նա։

Վերբերը ներկայացրեց նաև Հայաստանից իր տպավորությունները, և նշեց, որ ուրախ է իր այցի համար` այդքան պատասխանատու պահին։

«Գրական տապան. ապրիլ» ամենամյա միջազգային փառատոնի շրջանակում կայացավ Վերբերի պատմվածքների ժողովածուի հայերեն թարգմանության շնորհանդեսը։ Գիրքը թարգմանվել է Հայաստանի մշակույթի նախարարության օժանդակությամբ։

Բեռնար Վերբերը ժամանակակից ֆրանսիացի գրող է, փիլիսոփա։

«Գրական տապան. ապրիլ» միջազգային փառատոնն իրականացնում է Արտասահմանյան երկրների հետ մշակութային համագործակցության հայկական հասարակական կազմակերպությունը (ԱՕԿՍ)` ՀՀ մշակույթի նախարարության և Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի աջակցությամբ:-0-