Ազգային պատկերասրահում բացվեց «Պատասխան 100 տարի անց, անցյալը՝ ներկայում» խորագրով ցուցահանդեսը

ԵՐԵՎԱՆ, 21 ապրիլի. /Նովոստի–Արմենիա/. Ազգային պատկերասրահում բացվեց «Պատասխան 100 տարի անց, անցյալը՝ ներկայում» խորագրով ցուցահանդեսը, որը նվիրված է Հայոց ցեղասպանությանը։

Ցուցահանդեսին ներկայացված է հայ և ռուս հեղինակների 27 աշխատանք։

Նախագծի համակարգող և հեղինակ Հասմիկ Հախվերդյանը լրագրողներին տեղեկացրեց, որ, նկարներից բացի, նաև ինը քանդակ է ներկայացված։

«Նկարներն ու քանդակները պատրաստվել են վեց ամսում։ Երիտասարդ նկարիչները ստեղծել են իրենց ստեղծագործությունները մեծահասակ գործընկերների աջակցությամբ, որոնք խորհուրդներ են տվել, ուղղորդել նրանց», – ասաց Հախվերդյանը։

Նրա խոսքով` բոլոր աշխատանքները նվիրված են Հայոց ցեղասպանությանը։ Ցուցահանդեսին ներկայացված աշխատանքներից մի քանիսը հիմնված են Ցեղասպանության ականատեսների, մասնավորապես` հրաշքով փրկված արևմտահայ գրող Արամ Անտոնյանի, ինչպես նաև ժամանակակից ռումինահայ գրող Վարուժան Ոսկանյանի պատմությունների վրա։ Վարուժան Ոսկանյանը «Շշուկների մատյան» ստեղծագործության հեղինակն է։ 

Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։

Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգները, ինչպես նաև` Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0–Ա.Թ.