ԵՐԵՎԱՆ, 20 ապրիլի. /Նովոստի–Արմենիա/. Ավելի քան 120 երաժիշտներ 43 երկրներից «24.04» միավորված նվագախմբով համերգ կտան Երևանում ապրիլի 24–ին` Հայոց ցեղասպանության զոհերի հիշատակի օրը, երկուշաբթի լրագրողներին ասաց Հայաստանի պետական երիտասարդական նվագախմբի գեղարվեստական ղեկավար Սերգեյ Սմբատյանը։
«Այդ համերգին ելույթ կունենան Արգենտինայի, Ավստրիայի, Բրազիլիայի, Չինաստանի, Ռուսաստանի, Բոլիվիայի, Սերբիայի, Մեծ Բրիտանիայի, ԱՄՆ–ի և այլ երկրների լավագույն նվագախմբերի երաժիշտները»,– ասաց Սմբատյանը։
Ըստ նրա` նվագախումբը կկատարի վերջին 100 տարիներին գրված ստեղծագործություններ չորս հիմնական թեմաներով` հիշատակ, երախտագիտություն, միջազգային պայքար և վերածնունդ։
«Որպես մենակատարներ` ելույթ կունենան Սերգեյ Խաչատրյանը (թավջութակ), Նարեկ Հախնազարյանը (թավջութակ), Մարիա Գուլեգինան (սոպրանո), Գևորգ Հակոբյանը (բարիտոն), ինչպես նաև Ջիվան Գասպարյանը», – ասաց Սմբատյանը։
Նա նշեց նաև, որ համերգին կմասնակցեն Հայաստանի ազգային ակադեմիական թատրոնը և երկու աշխարհահռչակ դիրիժորներ` Միխայիլ Յուրովսկին և Ջանլուկա Մարչիանոն։
2014 թվականի սիմֆոնիկ նվագախմբի համերգը կսկսվի Երևանի Հանրապետության հրապարակում ժամը 20։15–ին։
Միջոցառումը կուղեկցվի համապատասխան տեսաշարով, այդ թվում` կցուցադրվեն հասարակայնությանն առաջին անգամ ներկայացվող նյութեր։
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ --0—
