SOAD–ի երևանյան համերգին շուրջ 50 հազար մարդ կարող է ներկա լինել

ԵՐԵՎԱՆ, 20 ապրիլի. /Նովոստի–Արմենիա/. System Of A Down ռոք–խմբի` ապրիլի 23–ին Հանրապետության հրապարակում նախատեսված համերգին կարող է ներկա լինել շուրջ 50 հազար մարդ, երկուշաբթի լրագրողներին տեղեկացրեց ՀՀ նախագահի աշխատակազմի ղեկավար, Հայոց ցեղասպանության 100–րդ տարելիցին նվիրված միջոցառումների համակարգող Վիգեն Սարգսյանը։

System Of A Down–ն ռոք խումբը հետևողական պայքար է մղում Հայոց ցեղասպանության միջազգային ճանաչման և դատապարտման համար։ Խմբի համերգը կսկսվի տեղական ժամանակով ժամը 20։10–ին։ Համերգը կանցկացվի «Արթնացրեք հոգիները» նշանաբանի ներքո։

Սարգսյանի խոսքով` Հանրապետության հրապարակ հնարավոր կլինի մտնել միայն Շահումյան հրապարակից` Վազգեն Սարգսյան փողոցի կողմից։

«Համերգի մուտքն ազատ է, սակայն մասնակիցների ընդհանուր թիվը սահմանափակ է լինելու։ Ելնելով անվտանգության նկատառումներից` հրապարակի մուտքը կփակվի այն ժամանակ, երբ հանդիսատեսի թիվը կհասնի 50 հազարի», – ասաց նա։

Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։

Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ --0—