Արամ Խաչատրյանի որդին Հայաստանի նախագահի հետ հոր ժառանգության պահպանության հարցերն է քննարկել

ԵՐԵՎԱՆ, 16 ապրիլի. /Նովոստի-Արմենիա/. Հայ մեծ կոմպոզիտոր Արամ Խաչատրյանի որդին`  Կարեն Խաչատրյանը, Հայաստանի նախագահ Սերժ Սարգսյանի հետ իր հոր հարուստ մշակութային ժառանգության պահպանության հետ կապված հարցեր է քննարկել։

Մասնավորապես, քննարկվել է Արամ Խաչատրյանի ստեղծագործությունների ամբողջական ժողովածուի հրատարակման հարցը, որի իրագործմանը նախագահը պատրաստակամություն է հայտնել աջակցել:

Հանրապետության նախագահը կարևորել է, որ համաշխարհային ճանաչում և հռչակ ունեցող մեծ արվեստագետի հարազատները ոչ միայն չեն կորցնում կապը պատմական հայրենիքի հետ, այլև փորձում են իրենց հնարավորությունների սահմաններում աջակցել պետության կողմից Արամ Խաչատրյանի հիշատակը հավերժացնելու և նրա երաժշտական հարուստ ժառանգությունը պահպանելու, ապագա սերունդներին փոխանցելու գործում ներդրվող ջանքերին:

Կարեն Խաչատրյանը շնորհակալություն է հայտնել նախագահ Սերժ Սարգսյանին, մշակույթի նախարարությանը և բոլոր այն շահագրգիռ անձանց, ովքեր մշտապես ուշադրության կենտրոնում են պահում մաեստրոյի կյանքն ու գործունեությունը, հանդես գալիս նրա ժառանգության պահպանմանն ու ներկայացմանն ուղղված նոր ծրագրերով, նպաստում դասական երաժշտության, մասնավորապես, Արամ Խաչատրյանի երաժշտության հանրահռչակմանն ու երիտասարդների շրջանում հետաքրքրության բարձրացմանը:

Այս համատեքստում Կարեն Խաչատրյանը գոհունակությամբ է խոսել Արամ Խաչատրյանի անվան միջազգային մրցույթի մասին: Կարևորվել են նաև մեծ կոմպոզիտորի ժառանգության թվայնացման, տուն-թանգարանի վերանորոգման, պահպանման և այնտեղ գտնվող արժեքավոր նմուշները ՅՈՒՆԵՍԿՕ-ի «Աշխարհի հիշողություն» ռեեստրում ընդգրկելու ուղղությամբ իրականացված մեծածավալ աշխատանքները:--0--