Ապրիլի 15–ին Գյումրիում կմեկնարկի «Վերածնունդ» VII միջազգային մրցույթ–փառատոնը

ԵՐԵՎԱՆ, 8 ապրիլի. /Նովոստի–Արմենիա/. «Վերածնունդ» VII միջազգային երաժշտական մրցույթ–փառատոնի հանդիսավոր բացումը տեղի կունենա Գյումրու Աճեմյանի անվան պետական դրամատիկական թատրոնում ապրիլի 15–ին, հայտարարեց փառատոնի հիմնադիր և համանախագահ Կարինե Ավդալյանը։

«Այս տարի փառատոնին կմասնակցեն 36 երկրից ժամանած երաժիշտներ։ Փառատոնն այնքան հայտնի է դարձել, որ երիտասարդ կատարողներն ու հայտնի երաժիշտներն իրենք են մասնակցության հայտեր են ներկայացնում։ Այս տարի որպես փառատոնի ժյուրիի անդամներ հայտագրված են 85 հայտնի երաժիշտներ` 20 երկրից», – չորեքշաբթի հրավիրված ասուլիսի ժամանակ ասաց Ավդալյանը։

Նրա խոսքով` ժյուրիի անդամները կանցկացնեն նաև վարպետության դասեր և համերգներ կունենան Երևանում և Գյումրիում։

ՀՀ մշակույթի նախարար Հասմիկ Պողոսյանն իր հերթին բարձր գնահատեց հանրապետությունում նման միջոցառում անցկացնելու փաստը։

«Սա կայացած փառատոն է, որի անվանումն այլ կերպ է ընկալվում այս տարի, երբ մենք նշում ենք Հայոց ցեղասպանության 100–րդ տարելիցը։ Այս փառատոնի շնորհիվ մենք գտնում և աշխարհին ենք ներկայացնում տաղանդավոր երեխաների», – ասաց Պողոսյանը։

Նրա խոսքերով` փառատոնը սահմանում է նաև բարձր բարոյական նշաձող, քանի որ այս տարի «Վերածնունդ» փառատոնը նվիրվում է Հայոց ցեղասպանության 100–րդ տարելիցին և Հայրենական պատերազմում տարած հաղթանակի 70–ամյակին։ Միջոցառման շրջանակում կկազմակերպվի այս երկու տարեթվերին նվիրված «Մշակույթների երկխոսություն» միջազգային գիտաժողովը։

Այս տարի 36 երկրների 2,8 հազար կատարողներ մրցույթին մասնակցելու հայտ են ներկայացրել 14 անվանակարգում, որոնց թվում են` դաշնամուրը, լարային գործիքները, փողային գործիքները, ժողգործիքները, կամերային համույթը։ 

Մրցույթ-փառատոնն անցկացվում է Հայաստանի առաջին տիկին Ռիտա Սարգսյանի հովանու ներքո: Փառատոնի կազմակերպիչներն են Հայաստանի մշակույթի նախարարությունը, «Փյունիկ» մարդկային ռեսուրսների զարգացման համահայկական հիմնադրամը, ինչպես նաև` Կոմիտասի անվան Երևանի պետական կոնսերվատորիայի Գյումրու մասնաճյուղը, «Վերածնունդ» միջազգային մրցույթ–փառատոն ՀԿ–ն:

«Վերածնունդ» միջազգային մրցույթ-փառատոնն անցկացվում է 2009 թվականից: Մրցույթ-փառատոնի նպատակն է խթանել դասական արվեստի հանրայնացումը` հայ և արտասահմանցի երաժիշտ-կատարողների միջև ստեղծելով փոխհամագործակցության հարթակ: Փառատոնը երիտասարդներին դրսևորվելու, սեփական կարողությունները ճանաչելու հնարավորություն է տալիս։-0-