Հայոց ցեղասպանության 100-րդ տարելիցի կապակցությամբ Երևանում կցուցադրվի «Կոմիտաս. Կարոտի կռունկ» ֆիլմ–ներկայացումը

ԵՐԵՎԱՆ, 34 մարտի. /Նովոստի–Արմենիա/. Beeline–ի և «Համազգային վստահություն» խորհրդի համագործակցության շրջանակում կցուցադրվի «Կոմիտաս. Կարոտի կռունկ» ֆիլմ–ներկայացումը, հայտնում են Beeline ընկերության մամուլի ծառայությունից։

Ֆիլմ-ներկայացման առաջին ցուցադրությունը տեղի կունենա մարտի 30-ին Գ. Սունդուկյանի անվան Ազգային ակադեմիական թատրոնում: Ներկայացումը ցուցադրվում է Հայոց ցեղասպանության հարյուրամյակին նվիրված «Հիշում եմ և պահանջում» խորագրի ներքո անցկացվող միջոցառումների շրջանակում։

Ֆիլմ-ներկայացումը Կոմիտասի կերպարը ներկայացնում է այնպես, ինչպես այն եղել է իրականում՝ ըստ արխիվային նամակների, հուշերի, մենախոսությունների, մտքի պայծառացումների եւ մթագնումների:

Ֆիլմի ցուցադրությունից հետո տեղի կունենա Գրիգոր Տեր-Ավագյանի նկարների ցուցահանդես-վաճառքը` «Հայաստանը հոգու աչքերով» խորագրով: Ցուցահանդեսի նպատակն է ևս մեկ անգամ աշխարհին ցույց տալ հայ միտքը, հայ մշակույթը, խոսքն ու ձեռագիրը:

«Որպես հեռահաղորդակցության առաջատար օպերատոր` Beeline-ը կարևորում է Հայոց ցեղասպանության հարյուրամյակին նվիրված միջոցառումների աջակցությունը: Մշակույթն այն հզոր գործիքն է, որի միջոցով պատմական իրադարձություններն առավելագույնս մատչելի կերպով կարող են ներկայացվել լայն հանրությանը: Վստահ եմ, որ նմանատիպ մշակութային միջոցառումները կնպաստեն երիտասարդների և օտարերկրացիների շրջանում Հայոց ցեղասպանության վերաբերյալ իրազեկվածության բարձրացմանը եւ միջազգային ճանաչմանը», - նշեց Հայաստանում Beeline-ի Գլխավոր տնօրեն Անդրեյ Պյատախինը:

«Համազգային վստահություն» խորհրդի նախաձեռնությունն ուղերձ է քաղաքակիրթ մարդկությանը՝ Կոմիտասի միջոցով եւ Կոմիտասի շուրթերից. այդ ո՞ր  քարեղեն ուղեղն է ասել, որ մենք պիտի մեռնենք … մենք պիտի ապրենք …»,- նշեց «Համազգային վստահություն» խորհրդի նախագահ Աստղիկ Խաչատրյանը:

Ֆիլմը կցուցադրվի նաեւ Վրաստանում, Ռուսաստանում և Լիբանանում:-0-