Մոսկվայի սիմֆոնիկ նվագախումբը հանդես կգա Հայոց ցեղասպանությանը նվիրված համերգով

ԵՐԵՎԱՆ, 21 մարտի. /Նովոստի-Արմենիա/. Մոսկվայի պետական ակադեմիական սիմֆոնիկ նվագախումբը ապրիլի 18-ին հանդես կգա Հայոց ցեղասպանությանը նվիրված համերգով, հաղորդում է Հայաստանի պետական երիտասարդական նվագախմբի հասարակայնության հետ կապերի բաժինը:

«Հայոց ցեղասպանության 100-րդ տարելիցի միջոցառումների շրջանակներում աշխարհի տարբեր երկրների հեղինակավոր բեմերում տեղի են ունենում Մեծ եղեռնի ոգեկոչման համերգներ և ոչ միայն հայկական կոլեկտիվների մասնակցությամբ։ Ապրիլի 18-ին Մոսկվայում՝ Պ. Ի. Չայկովսկու անվան պետական կոնսերվատորիայի Մեծ դահլիճում, Մոսկվայի պետական ակադեմիական սիմֆոնիկ նվագախումբը՝ դիրիժոր Պավել Կոգանի ղեկավարությամբ, ելույթ կունենա Հայոց ցեղասպանության զոհերի հիշատակին նվիրված համերգով», - նշվում է հաղորդագրության մեջ:

Ծրագրում կհնչեն Շյոնբերգի, Մալերի ստեղծագործությունները։

Երեկոյի ընթացքում հանդես կգան նաև Վ. Ս. Պոպովի անվան երգչախմբային արվեստի ակադեմիայի երգչախումբը, Զանդրա Մակ-Մաստերը (կոնտրալտո, Մեծ Բրիտանիա)։-0-