Ղրիմը վերադարձրել է Այվազովսկու գլուխգործոցներն Ուկրաինայի թանգարաններից

ԵՐԵՎԱՆ, 20 մարտի. /Նովոստի–Արմենիա/. Սիմֆերոպոլի գեղարվեստական թանգարանի հավաքածուն, ներառյալ Այվազովսկու և Շիշկինի նկարները, որոնք ցուցադրվել են ուկրաինական թանգարաններում Ռուսաստանի հետ թերակղզու վերամիավորումից առաջ, ողջ ծավալով վերադարձվել է Ղրիմ, հայտնել է Ղրիմի մշակույթի նախարար Արինա Նովոսելսկայան Ղրիմի խորհրդարանի նստաշրջանի ժամանակ։

Ըստ նրա` Ղրիմի հանրաքվեից մի քանի օր առաջ հայտնի է դարձել, որ Սիմֆերոպոլի գեղարվեստական թանգարանի հավաքածուի մի մասը, որը գնահատվում է մի քանի միլիարդ ռուբլի, գտնվում է Մելիտոպոլի, Օդեսայի և Կիևի ցուցահանդեսներում։

«Դրանք անգին սրբապատկերներ են, Այվազովսկու և Շիշկինի գլուխգործոցները, և այդ հավաքածուն Ղրիմը կարող էր կորցնել ընդմիշտ։ Միայն Ղրիմի մշակույթը համակարգող ընկերների, Ուկրաինայի մեր գործընկերների և բարեկամների անձնուրաց գործողությունների շնորհիվ հաջողվել է աներևակայելի ձևով, ինչպես հետախույզների մասին ֆիլմերում, վերադարձնել այդ հավաքածուն թանգարանի ֆոնդեր։ Այսօր այն Սիմֆերոպոլի գեղարվեստական թանգարանում է ողջ ծավալով»,– ասել է նախարարը, հաղորդում է «ՌԻԱ Նովոստին»։

Ղրիմը և Ղրիմի թերակղզու Սևաստոպոլ քաղաքը ռուսական տարածաշրջաններ են դարձել 2014 թվականի մարտի 16–ի հանրաքվեից հետո, որի մասնակիցների ավելի քան 90 տոկոսը քվեարկել է Ռուսաստանին միանալու օգտին։ Հանրաքվեն Կիևի փետրվարի 22–ի պետական հեղաշրջման արձագանքն էր։ -0-