Հայաստանի ազգային ֆիլհարմոնիկ նվագախումբը մարտի 20–ին հանդես կգա հոբելյանական համերգով

ԵՐԵՎԱՆ, 19 մարտի. /Նովոստի–Արմենիա/. Մարտի 20–ին տեղի կունենա Հայաստանի ազգային ֆիլհարմոնիկ նվագախմբի հոբելյանական համերգը, որը նվիրված է նվագախմբի առաջին համերգին։ Այն կայացել է 1925 թ.–ի մարտի 20–ին, հաղորդում է նվագախմբի մամուլի ծառայությունը։

Համերգը տեղի կունենա Օպերայի և բալետի ազգային ակադեմիական թատրոնում` նվագախմբի գեղարվեստական ղեկավար և գլխավոր դիրիժոր Էդուարդ Թոփչյանի գլխավորությամբ։ Հոբելյանական համերգի ընթացքում կհնչեն Մոցարտի թիվ 39 և Բրուքների թիվ 4 մեծակտավ սիմֆոնիաները։

Ինչպես տարեսկզբից ի վեր կայացած բոլոր համերգները, այս մեկը նույնպես կկայանա Հայոց ցեղասպանության 100–րդ տարելիցի «Հիշում և պահանջում եմ» խորագրի ներքո։ Հայաստանի ազգային ֆիլհարմոնիկ նվագախումբը հայ ժողովրդի վերածննդի յուրօրինակ խորհրդանիշներից մեկն է` հիմնադրված լինելով ցեղասպանությունից 10 տարի անց և լուսավորելով հայ ժողովրդի անցած դժվարին ուղին 90–ամյա իր անընդմեջ գործունեությամբ։

Հայաստանի ազգային ֆիլհարմոնիկ նվագախումբը, որը հիմնադրել են հռչակավոր հայ երաժիշտներ Արշակ Ադամյանն ու Ալեքսանդր Սպենդիարյանը, երկար տարիներ եղել է նախկին ԽՍՀՄ–ի առաջատար երաժշտական համույթներից մեկը։ Այսօր այն պրոֆեսիոնալ նվագախմբային արվեստի ազգային կենտրոնն է։ Տարբեր տարիներին Պետական ֆիլհարմոնիկ նվագախումբը գլխավորել են Արշակ Ադամյանը, Ալեքսանդր Սպենդիարյանը, Սուրեն Չարեկյանը, Կոնստանտին Սարաջևը, Օհան Դուրյանը, Վալերի Գյորգիևը, Լորիս Ճգնավորյանը։ 2000 թ.–ից նվագախմբի գեղարվեստական ղեկավարն ու գլխավոր դիրիժորը Էդուարդ Թոփչյանն է։ 2014 թ.–ի նոյեմբերին Հայաստանի պետական ֆիլհարմոնիկ նվագախմբին տրամադրվել է ազգային համույթի կարգավիճակ։

«Նովոստի–Արմենիա» գործակալությունը նվագախմբի ինֆորմացիոն հովանավորն է։–0–