Աշխարհահռչակ ֆրանսիացի դաշնակահար Ռիշար Քլայդերմանն առաջին անգամ համերգ կունենա Երևանում

ԵՐԵՎԱՆ, 12 մարտի. /Նովոստի–Արմենիա/. Աշխարհահռչակ ֆրանսիացի դաշնակահար, գործիքավորող, դասական և էթնիկ երաժշտության կատարող Ռիշար Քլայդերմանը Երևանում համերգներ կունենա մարտի 13-ին և 14-ին։։

«Երևանում ես կներկայացնեմ հատվածներ այն ստեղծագործություններից, որոնք կատարել եմ իմ կարիերայի ամենասկզբում, ինչպես նաև մեղեդիներ իմ վերջին` «Ռոմանտիկա» և կինոնկարների համար գրված երաժշտությունից», - ասաց Քլայդերմանը։ Պատասխանելով «Նովոստի-Արմենիա» գործակալության հարցին` թե ինչ անակնկալներ են սպասում հայ ունկնդրին, երաժիշտն ընդգծեց, որ մեծ պատասխանատվությամբ է վերաբերվում Երևանի համերգներին, քանի որ սա իր առաջին այցն է Հայաստան։ Նրա խոսքերով` ինքը երբեք միևնույն երաժշտությունը չի նվագել նույն զգացմունքայնությամբ։

«Իմ երկացանկում կա հատված Արամ Խաչատրյանի «Սպարտակ» բալետից։ Հուսով եմ, որ Երևան իմ հաջորդ այցի ժամանակ ես հայ կոմպոզիտորների այլ ստեղծագործություններ ևս կկատարեմ», - ասաց նա։   

Քլայդերմանն ընդգծեց, որ շատ ուրախ է Հայաստան այցելելու և երկրի մասին ավելին իմանալու հնարավորության համար։ Հայաստան այցը նաև լավ հնարավորություն է հայ երաժիշտների հետ աշխատելու համար։

Ռիշար Քլայդերմանը կոնսերվատորիա է ընդունվել 12 տարեկանում։ Նա աշխատել է Միշել Սարդուի, Թիերի Լը Լյուրոնի և Ջոնի Հոլիդեյի հետ։

Նրան աստղ է դարձրել համաշխարհային ճանաչում ստացած «Բալլադ Ադելինի համար» ստեղծագործությունը, որի հեղինակը Պոլ դը Սենևիլն է։ Ձայնագրության շուրջ 22 մլն օրինակ է վաճառվել աշխարհի ավելի քան 30 երկրում։ Քլայդերմանը ձայնագրել է ավելի քան 1200 երաժշտական ստեղծագործություն և թողարկել է ավելի քան 100 ձայնասկավառակ` 90 մլն օրինակ ընդհանուր քանակով։

Քլայդերմանի համերգները կանցկացվեն Ա. Սպենդիարյանի անվան օպերայի և բալետի ազգային ակադեմիական թատրոնում` Հայաստանի պետական կամերային նվագախմբի մասնակցությամբ։-0-