Հայաստանին նվիրված ցուցահանդես կբացվի Ռուսական ազգագրական թանգարանում ապրիլին

ԵՐԵՎԱՆ, 10 մարտի. /Նովոստի-Արմենիա/. Հայաստանին նվիրված ազգագրական ցուցահանդես կբացվի Սանկտ Պետերբուրգի Ռուսական ազգագրական թանգարանում ապրիլին, երեքշաբթի լրագրողներին հայտնեց թանգարանի տնօրեն Վլադիմիր Գրուսմանը։

«Ցուցահանդեսը հիմնված կլինի հայտնի ազգագրագետ Ալեքսանդր Միլլերի հավաքածուի վրա։ Ցուցանմուշների թվում կլինեն մոտ 400 ոսկերչական գործեր, որոնք հավաքել է Միլլերը Առաջին համաշխարհային պատերազմի տարիներին Վան-Վասպուրականում», - ասաց Գրուսմանը Հայաստանի պատմության թանգարան այցի ժամանակ։

Նրա խոսքերով` 2015 թվականի հունիսին ցուցահանդեսը կներկայացվի Մոսկվայում, իսկ սեպտեմբերի 21-ին` Հայաստանի անկախության օրը, Երևանում։

«Նախօրեին մենք այդ մասին պայմանավորվեցինք Հայաստանի մշակույթի նախարար Հասմիկ Պողոսյանի հետ։ Ցուցահանդեսն, ամենայն հավանականությամբ, կլինի Հայաստանի պատմության թանգարանում։ Չափազանց կարևոր է ցույց տալ, թե ինչ մշակույթ ունեին այդ մարդիկ», - ընդգծեց նա։

Գրուսմանը նշեց, որ Հայաստանում է առաջին անգամ։

«Ես եղա Հայոց ցեղասպանության թանգարան-ինստիտուտում, որն ինձ վրա մեծ տպավորություն թողեց։ Երբ դուրս եկա այնտեղից, առաջին անգամ տեսա Արարատ լեռը։ Այնտեղ ինձ նվիրեցին Ցեղասպանության 100-րդ տարելիցի խորհրդանիշը` անմոռուկը... Անհնար է մոռանալ այդ արյունալի ողբերգությունը, դա մարդկության դեմ կատարված հանցագործություն է», - ասաց նա։

Ռուսական ազգագրական թանգարանը Եվրոպայի խոշորագույն ազգագրական թանգարաններից է։ Հիմնադրվել է 1902 թ. հունվարին Սանկտ Պետերբուրգում։--0--