Դերասանուհի Լիա Ախեջակովան կարժանանա «Նիկա» մրցանակի` «Պատվի և արժանապատվության համար» անվանակարգում

ԵՐԵՎԱՆ, 3 մարտի. /Նովոստի–Արմենիա/. «Պատվի և արժանապատվության համար» անվանակարգում ռուսական ազգային «Նիկա» կինեմատոգրաֆիայի մրցանակի կարժանանա դերասանուհի Լիա Ախեջակովան, երեքշաբթի ասուլիսի ժամանակ տեղեկացրել են մրցանակի կազմակերպիչները, հաղորդում է «ՌԻԱ Նովոստին»։

«Նիկա» մրցանակաբաշխությունը տեղի կունենա մարտի 31–ին «Ռուսկայա պեսնյա» ֆոլկլորի ռուսական պետական թատրոնի նոր սրահում։

«Պատվի և արժանապատվության համար «Նիկա» մրցանակին կարժանանա Լիա Ախեջակովան», – տեղեկացրել է «Նիկա» կինոակադեմիայի նախագահ, ռեժիսոր Անդրեյ Կոնչալովսկին։

«Գիտության, կինոքննադատության և կինոստեղծման գործում կատարած ներդրման համար» կպարգևատրեն «Կինոյի թանգարանի» ստեղծող և նախկին տնօրեն Նաում Կլեյմանին։ «Կինեմատոգրաֆում կատարած մեծ ներդրման համար» հատուկ մրցանակի կարժանանա սցենարիստ Յուրի Կլեպիկովը։

«Նիկա» մրցանակը հանձնվում է 1988 թ.–ից։ Հաղթողները ստանում են հաղթանակի թևավոր աստվածուհու արձանիկներ (քանդակագործը Սերգեյ Միկուլսկին է)։ «Նիկա» մրցանակի հիմնադիր և գեղարվեստական ղեկավարը ռեժիսոր Յուլի Գուսմանն է։ «Նիկա» կինոակադեմիայի նախագահն է ռեժիսոր Անդրեյ Կոնչալովսկին։ 2014 թ.–ին «Պատվի և արժանապատվության համար» անվանակարգում մրցանակի էր արժանացել Վլադիմիր Զելդինը։–0–