ԵՐԵՎԱՆ, 3 մարտի. /Նովոստի–Արմենիա/. Հայոց ցեղասպանության 100–րդ տարելիցի կապակցությամբ` ապրիլի 24–ին ընդառաջ Հայոց ցեղասպանության տարիներին զոհված գրողների ստեղծագործությունների անթոլոգիաներ կհրատարակվեն, երեքշաբթի լրագրողներին ասաց Հայաստանի գրողների միության նախագահ Էդվարդ Միլիտոնյանը։
Նրա խոսքերով` այս ծրագիրն ուղղված է նրան, որպեսզի յուրաքանչյուր ընթերցող հասկանա, որ Օսմանյան կայսրությունում առաջին հերթին սպանում էին մտավորականության ներկայացուցիչներին և տաղանդավոր մարդկանց, որոնց մեջ իրական սպառնալիք էին տեսնում։
«Հայաստանի մշակույթի նախարարությունը գրքերի ցանկ է հրապարակել, որոնց մի մասը պետք է վերահրատարակվի, ևս մի մասը պետք է թարգմանվի, դրանով էլ հենց զբաղվում է Գրողների միությունը», – նշեց Միլիտոնյանը։
Ցեղասպանության տարիների զոհված գրողների (Դանիել Վարուժան, Սիամանթո, Գրիգոր Զոհրաբ, Ռուբեն Սևակ և այլոք) ստեղծագործությունների ժողովածուները, Գրողների միության նախագահի խոսքերով, կհրատարակվեն գերմաներեն, ռուսերեն, անգլերեն և ֆրանսերեն։
«Թարգմանված ժողովածուներից մեկն արդեն պատրաստ է և շուտով լույս կտեսնի Գերմանիայում։ Մայիսի 10–ին Մագդեբուրգում կհրատարակվեն մյուս գրքերը գերմաներենով», – ասաց Միլիտոնյանն` ավելացնելով, որ Հայաստանում նույն անթոլոգիաները կհրատարակվեն մինչև ապրիլի 24–ը։
Նրա խոսքերով` Գրողների միությունը մտադիր է 2015 թ.–ից հետո ևս շարունակել այդ հեղինակների ստեղծագործությունների հրատարակումը։
Խոսելով Գրողների միության կողմից նախատեսված միջովառումների մասին` Միլիտոնյանը նշեց, որ մարտին և ապրիլին կկազմակերպվեն բազմաթիվ հանդիպումներ, շնորհանդեսներ, քննարկումներ, որոնք այդ թվում կնվիրվեն Մանկական գրքի օրվան (ապրիլի 2) և Պոեզիայի համաշխարհային օրվան (մարտի 21)։
Միլիտոնյանը նաև նշեց, որ նա և իր գործընկերները ջանքեր են գործադրում, որպեսզի հաջորդ տարին Հայաստանում հռչակվի գրականության տարի։
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ --0—
