Երևանում կանցկացվի Մարտի 8–ին նվիրված «Սիրելի կանանց համար» ցուցահանդեսը

ԵՐԵՎԱՆ, 2 մարտի. /Նովոստի–Արմենիա/. Մարտի 5–ին  Երևանի «Մոսկվայի տուն» մոսկովյան մշակութային–գործարար կենտրոնում կբացվի «Սիրելի կանանց համար» Հայաստանի վաստակավոր նկարիչ Անատոլի Ավետյանի անհատական ցուցահանդեսը, որը նվիրված է Կանանց միջազգային օրվան, հաղորդում է «Մոսկվայի տան» մամուլի ծառայությունը։

Ցուցահանդեսը կբացվի ժամը 18։00–ին «Մոսկվայի տան» ցուցահանդեսների սրահում։ Մուտքն ազատ է։

«Քանի որ միջոցառումը նվիրված է Կանանց միջազգային օրվան, վարպետը ցուցադրության համար ընտրել է իր լավագույն կանացի դիմանկարները, որոնք ստեղծված են իր անկրկնելի ոճում», – նշվում է հաղորդագրության մեջ։

Անատոլի Ավետյանը ծնվել է 1952 թ.–ին Սիբիրում։ 1967 թ.–ին տեղափոխվել է Հայաստան։ Բարձրագույն կրթությունը ստացել է Թբիլիսիի Գեղարվեստի ակադեմիայում։

Պարգևատրվել է ՀՀ մշակույթի նախարարության պատվոգրով։ Ավետյանը Հայաստանի նկարիչների միության վարչության անդամ է։

Անատոլի Ավետյանի աշխատանքները ցուցադրված են Հայաստանի ազգային պատկերասրահում, Հայաստանի ազգագրության թանգարանում, Ժամանակակից արվեստի թանգարանում, Մոսկվայի մշակույթի հիմնադրամում, Բոստոնի «Ալմա» թանգարանում, Փարիզի քաղաքապետարանում, Հռոմի Պապի նկարների հավաքածուում և այլուր։

Ցուցահանդեսը կազմակերպվում է Մոսկվայի արտաքին տնտեսական և միջազգային կապերի դեպարտամենտի, «Միջազգային համագործակցության մոսկովյան կենտրոն» պետական ձեռնարկության և Երևանում «Մոսկվայի տան» կողմից։ –0–